പയ്യന്നൂര്‍ നഗരസഭയില്‍ കുടുംബശ്രീ സെക്യൂരിറ്റി സേന രൂപീകരിച്ചു

By | Thursday January 16th, 2020

SHARE NEWS

കണ്ണൂര്‍: പുരുഷന്മാര്‍ മാത്രം അടക്കി വാണിരുന്ന സുരക്ഷാ മേഖലയിലേക്ക് ചുവടുവച്ച് പയ്യന്നൂര്‍ നഗരസഭയില്‍ കുടുംബശ്രീയുടെ സെക്യൂരിറ്റി സേന രൂപീകൃതമായി. പയ്യന്നൂര്‍ നഗരസഭ ഹാളില്‍ നടന്ന പരിപാടി കണ്ണൂര്‍ ജില്ല കലക്ടര്‍ ടിവി സുഭാഷ് ഉദ്ഘാടനം ചെയ്തു. ലോകത്താകമാനം സ്ത്രീകള്‍ എല്ലാ മേഖലകളിലും ഇടപെട്ടു പ്രവര്‍ത്തിക്കുന്നുണ്ടെങ്കിലും കേരളത്തില്‍ ഇപ്പോഴും ചില കാര്യങ്ങളില്‍ അലിഖിതമായ നിയമങ്ങളും അതിര്‍വരമ്പുകളും നിലനില്‍ക്കുന്നുണ്ടെന്ന് ജില്ലാ കലക്ടര്‍ അഭിപ്രായപ്പെട്ടു. അത്യാധുനിക സൗകര്യങ്ങള്‍ ദൈനംദിന ജീവിതത്തില്‍ ഉപയോഗിക്കുമ്പോഴും പുരാതനമായ ചിന്തകളാണ് നമ്മെ നയിക്കുന്നത്. സെക്യൂരിറ്റി സേന രൂപീകരിച്ചതിലൂടെ മാതൃകാപരമായ പ്രവര്‍ത്തനമാണ് പയ്യന്നൂര്‍ നഗരസഭ കാഴ്ചവച്ചിരിക്കുന്നതെന്നും ജില്ലാ കലക്ടര്‍ പറഞ്ഞു. വെല്ലുവിളികളെ ഏറ്റെടുത്തു കൊണ്ട് സമൂഹത്തിന്റെ മുഖ്യധാരയിലേക്ക് സ്ത്രീകള്‍ ഉയര്‍ന്നു വരണമെന്നും അദ്ദേഹം കൂട്ടിച്ചേര്‍ത്തു. 28 വനിതകളാണ് സെക്യൂരിറ്റി സേനയില്‍ പ്രവര്‍ത്തിക്കുന്നത്. റിട്ട. ആര്‍മി ഉദ്യോഗസ്ഥനായ രാമചന്ദ്രനാണ് ഇവര്‍ക്ക് ശാസ്ത്രീയ പരിശീലനം നല്‍കിയത്.

പയ്യന്നൂരും പരിസരങ്ങളിലും ഏതാവശ്യത്തിനും ഇവരുടെ സുരക്ഷ ഇനി ലഭിക്കും. കല്യാണത്തിരക്കുകളിലും മറ്റു ചടങ്ങുകളിലും ഇവരുടെ സേവനം ലഭ്യമാണ്. സ്ത്രീകള്‍ക്ക് സ്വയം തൊഴിലും സാമ്പത്തിക ഭദ്രതയും കൂടിയാണ് ഇതുവഴി ലക്ഷ്യമിടുന്നത്. പച്ച ചുരിദാറിനു മുകളില്‍ കരിനീല കോട്ടും തൊപ്പിയും അണിഞ്ഞ കുടുംബശ്രീ സെക്യൂരിറ്റി വിംഗിന്റെ ക്യാപ്റ്റന്‍ എം വി മഞ്ജുളയാണ്. 615 അയല്‍ക്കൂട്ടങ്ങളിലായി പന്ത്രണ്ടായിരത്തോളം കുടുംബശ്രീ അംഗങ്ങളാണ് പയ്യന്നൂര്‍ നഗരസഭയില്‍ ഉള്ളത്. കുടുംബശ്രീ അംഗങ്ങള്‍ക്ക് തൊഴില്‍ സംരംഭങ്ങള്‍ ഒരുക്കുന്ന വൈവിധ്യമാര്‍ന്ന പദ്ധതികളും നടന്നു വരുന്നുണ്ട്. നഗരസഭ അധ്യക്ഷന്‍ അഡ്വ. ശശി വട്ടക്കൊവ്വല്‍ ചടങ്ങില്‍ അധ്യക്ഷനായി. നഗരസഭ ഉപാധ്യക്ഷ കെ പി ജ്യോതി, കുടുംബശ്രീ ജില്ലമിഷന്‍ കോ ഓഡിനേറ്റര്‍ ഡോ. സുര്‍ജിത്, സിഡിഎസ് ചെയര്‍പേഴ്‌സണ്‍ കെ കവിത, വൈസ് ചെയര്‍പേഴ്‌സണ്‍ കെ വി ശോഭ, മെമ്പര്‍ സെക്രട്ടറി കെ പി ഗോപാലന്‍, നഗരസഭ സ്ഥിരം സമിതി അധ്യക്ഷന്മാര്‍, കൗണ്‍സിലര്‍മാര്‍, സിഡിഎസ് അംഗങ്ങള്‍, നഗരസഭ ജീവനക്കാര്‍ തുടങ്ങിയവര്‍ പങ്കെടുത്തു.

Tags:
English summary
Loading...
ചുവടെ കൊടുക്കുന്ന അഭിപ്രായങ്ങള്‍ പാനൂര്‍ ന്യൂസിന്‍റെതല്ല . സോഷ്യല്‍ നെറ്റ്‌വര്‍ക്ക് വഴി ചര്‍ച്ചയില്‍ പങ്കെടുക്കുന്നവര്‍ അശ്ലീലമോ അസഭ്യമോ തെറ്റിദ്ധാരണാജനകമോ അപകീര്‍ത്തികരമോ നിയമവിരുദ്ധമോ ആയ അഭിപ്രായങ്ങള്‍ പോസ്റ്റ് ചെയ്യുന്നത് സൈബര്‍ നിയമപ്രകാരം ശിക്ഷാര്‍ഹമാണ്. വ്യക്തികള്‍, മതസ്ഥാപനങ്ങള്‍ എന്നിവയ്‌ക്കെതിരേയുള്ള പരാമര്‍ശങ്ങള്‍ ഒഴിവാക്കേണ്ടതാണ്

Send News:

Your email address will not be published. Required fields are marked *

*

*

Also Read