---
title: "ആകാശുമായി കൂട്ടുകൂടരുത് ; അച്ചടക്ക  വടിയെടുത്ത് സി പി എം"
english_title: "Do not associate with the akash;CPM took the disciplinary stick"
publisher: "panoornews.in"
canonical_url: "https://panoor.truevisionnews.com/news/97952/do-not-associate-with-the-akashcpm-took-the-disciplinary-stick"
published_at: "2023-02-18T14:43:00+05:30"
category: "News"
language: "ml"
image: "https://cf.zdn.im/img/truevisionnews.com/0/image-uploads/63f096f69ada6_download_(6).jpg"
keywords: []
---

# ആകാശുമായി കൂട്ടുകൂടരുത് ; അച്ചടക്ക  വടിയെടുത്ത് സി പി എം

> **Lead Summary:** ആകാശ് തില്ലങ്കേരിവിഷയത്തില്‍ പാര്‍ട്ടിയിലുണ്ടായ വിവാദങ്ങള്‍ ചര്‍ച്ച ചെയ്യുന്നതിനായി സി പി എം അടിയന്തിര യോഗം ചേര്‍ന്നു. തില്ലങ്കേരിയിലാണ് ലോക്കല്‍ കമ്മിറ്റിയോഗം വിളിച്ചു ചേര്‍ത്തത്. സി പി എം കണ്ണൂര്‍ ജില്ലാസെക്രട്ടറി എം വി ജയരാജന്‍ യോഗത്തില്‍ പങ്കെടുത്തു.

## Article Content

ആകാശ് തില്ലങ്കേരിവിഷയത്തില്‍ പാര്‍ട്ടിയിലുണ്ടായ വിവാദങ്ങള്‍ ചര്‍ച്ച ചെയ്യുന്നതിനായി സി പി എം അടിയന്തിര യോഗം ചേര്‍ന്നു. തില്ലങ്കേരിയിലാണ് ലോക്കല്‍ കമ്മിറ്റിയോഗം വിളിച്ചു ചേര്‍ത്തത്. സി പി എം കണ്ണൂര്‍ ജില്ലാസെക്രട്ടറി എം വി ജയരാജന്‍ യോഗത്തില്‍ പങ്കെടുത്തു.

ആകാശ് തില്ലങ്കേരിയുടെ വെളിപ്പെടുത്തലിന്‍റെ ഭാഗമായി സോഷ്യല്‍മീഡിയയില്‍ ആകാശിനെ അനുകൂലിക്കുന്നവരും സി പി എം പ്രവര്‍ത്തകരും തമ്മിലുളള ഏറ്റുമുട്ടല്‍ തുടരുന്നു സാഹചര്യത്തിലാണ് സി പി എം നിലവിലുളള സാഹചര്യങ്ങള്‍ വിലയിരുത്തുന്നത്. തില്ലങ്കേരി ലോക്കല്‍ കമ്മിറ്റിക്ക് കീഴിലെ വഞ്ഞേരി മുന്‍ബ്രാഞ്ചംഗമായിരുന്നു ആകാശ് തില്ലങ്കേരി. എന്നാല്‍ ആകാശുമായി ഇപ്പോഴും ചില പാര്‍ട്ടി സഖാക്കള്‍ രഹസ്യബന്ധം പുലര്‍ത്തുന്നുണ്ടെന്ന് സി പി എം നേതൃത്വത്തിന് വ്യക്തമായിട്ടുണ്ട്.

ആറുമാസം മുന്‍പ് ഏച്ചൂര്‍ സി ആര്‍ ഓഡിറ്റോറിയത്തില്‍ നടന്ന ആകാശ് തില്ലങ്കേരിയുടെ വിവാഹത്തിന് ഏരിയാ, ലോക്കല്‍ നേതാക്കള്‍ പങ്കെടുത്ത ചിത്രം പുറത്തുവന്നിരുന്നു. പാര്‍ട്ടിവിലക്കുണ്ടായിട്ടും ആകാശിനെ പ്രാദേശിക നേതൃത്വത്തില്‍ ചിലര്‍ സംരക്ഷിക്കുന്നുണ്ടെന്ന വിമര്‍ശനത്തെ തുടര്‍ന്നാണ് ആകാശ് വിഷയം ചര്‍ച്ച ചെയ്യുന്നതിനായി സി പി എം നേതൃത്വം അടിയന്തിര യോഗം വിളിച്ചു ചേര്‍ത്തത്. സോഷ്യല്‍മീഡിയയിലൂടെ ആകാശിനെ അനുകൂലിക്കുന്നവരുമായുളള പോര് ഉടന്‍ നിര്‍ത്തണമെന്ന്‌ സി പി എം ജില്ലാസെക്രട്ടറി ആവശ്യപ്പെട്ടിട്ടുണ്ട്. ആകാശിനെയും അയാളെ അനുകൂലിക്കുന്നവരുടെയും ആരോപണങ്ങള്‍ മറുപടി പറയേണ്ടതില്ലെന്നാണ് സി പി എം നേതൃത്വത്തിന്‍റെ വിലയിരുത്തല്‍. പാര്‍ട്ടിയോട് ഏറ്റുമുട്ടുന്നുവെന്ന ഇമേജ് സൃഷ്ടിച്ചു മാധ്യമശ്രദ്ധനേടാനുളള ആകാശ തില്ലങ്കേരിയുടെ വിവാദശ്രമങ്ങളെ ഇനിയും പ്രോത്സാഹിപ്പിക്കേണ്ടതില്ലെന്ന നിലപാടാണ് സി പി എം സ്വീകരിക്കുന്നത്. നേരത്തെ ഡി വൈ എഫ് ഐ നേതാക്കളെ സോഷ്യല്‍മീഡിയയില്‍ ഇക്‌ഴ്ത്തിക്കൊണ്ടും കൊലനടത്താന്‍ പറഞ്ഞത് എടയന്നൂരിലെ പാര്‍ട്ടി നേതാക്കളാണെന്നും വെളിപ്പെടുത്തി കൊണ്ടുളള ആകാശ് തില്ലങ്കേരിയുടെ ഫെയ്‌സ് ബുക്ക് കമന്‍റ് വിവാദമായിരുന്നു.

ഒപ്പം ഡി വൈ എഫ് ഐ നേതാവ് രാഗിന്ദിനോട് വിതച്ചതേ കൊയ്യൂവെന്ന് ആകാശ് തില്ലങ്കേരി പറഞ്ഞതും ചർച്ചയായി. ഇതുകൂടാതെ ഡി വൈ എഫ് ഐ വനിതാ നേതാവിനെതിരെ സ്ത്രീത്വത്തെ അപമാനിക്കുന്നു വിധത്തില്‍ ഫേസ്ബുക്ക് കമന്‍റിട്ടതിനാണ് ആകാശ് തില്ലങ്കേരിക്കെതിരെ ജാമ്യമില്ലാകുറ്റം ചുമത്തി മുഴക്കുന്ന് പോലിസ് കേസെടുത്തത്. എന്നാല്‍ ഈ കേസില്‍ ആകാശും കൂട്ടാളികളും വെളളിയാഴ്ച്ച വൈകുന്നേരം മട്ടന്നൂര്‍ കോടതിയില്‍ നിന്നും ജാമ്യം നേടിയിരുന്നു.

### Related Links & Sources
- [Original Story Source](https://panoor.truevisionnews.com/news/97952/do-not-associate-with-the-akashcpm-took-the-disciplinary-stick)