---
title: "ഇന്ത്യൻ സൈനിക സേവനമെന്ന സ്വപ്നത്തിലേക്ക് ചുവടുവെക്കാനിരിക്കെ 19 കാരനെ മരണം കവർന്നു ; പാനൂരിനെയാകെ  കണ്ണീരിലാഴ്ത്തി ഷാൽമിലിന്റെ അപ്രതീക്ഷിത വിയോഗം"
english_title: "19-Year-Old Shalmin Dies After Collapsing During Football"
publisher: "panoornews.in"
canonical_url: "https://panoor.truevisionnews.com/news/391592/panoor-shalmin-dies-collapsing-football-game"
published_at: "2026-11-14T12:29:00+05:30"
category: "News"
language: "ml"
image: "https://cf.zdn.im/img/truevisionnews.com/0/image-uploads/6af807711ec0b_panoor-shalmin-dies-collapsing-football-game.jpg"
keywords: ["Panoor Death", "Shalmin Sajeev", "Vallangad", "Football Death", "Agniveer"]
---

# ഇന്ത്യൻ സൈനിക സേവനമെന്ന സ്വപ്നത്തിലേക്ക് ചുവടുവെക്കാനിരിക്കെ 19 കാരനെ മരണം കവർന്നു ; പാനൂരിനെയാകെ  കണ്ണീരിലാഴ്ത്തി ഷാൽമിലിന്റെ അപ്രതീക്ഷിത വിയോഗം

> **Lead Summary:**  പാനൂർ:ഫുട്ബോൾ കളിക്കിടെ കുഴഞ്ഞുവീണ് 19കാരനായ യുവാവ് മരിച്ചതോടെ പാനൂർ വള്ളങ്ങാട് പ്രദേശം ദുഃഖത്തിലായി. വള്ളങ്ങാട് പെട്രോൾ പമ്പിന് സമീപം താമസിക്കുന്ന പാനേന്റവിട ഷാൽമിൻ സജീവാണ് മരിച്ചത്. ടർഫിൽ സുഹൃത്തുക്കൾക്കൊപ്പം ഫുട്ബോൾ കളിക്കുന്നതിനിടെയാണ് ഷാൽമിൻ കുഴഞ്ഞുവീണത്. അപ്രതീക്ഷിതമായ ഈ ദുരന്തവാർത്ത നാട്ടുകാരെയും സുഹൃത്തുക്കളെയും ഒരുപോലെ ഞെട്ടിച്ചു.

## Article Content

 പാനൂർ:ഫുട്ബോൾ കളിക്കിടെ കുഴഞ്ഞുവീണ് 19കാരനായ യുവാവ് മരിച്ചതോടെ പാനൂർ വള്ളങ്ങാട് പ്രദേശം ദുഃഖത്തിലായി. വള്ളങ്ങാട് പെട്രോൾ പമ്പിന് സമീപം താമസിക്കുന്ന പാനേന്റവിട ഷാൽമിൻ സജീവാണ് മരിച്ചത്. ടർഫിൽ സുഹൃത്തുക്കൾക്കൊപ്പം ഫുട്ബോൾ കളിക്കുന്നതിനിടെയാണ് ഷാൽമിൻ കുഴഞ്ഞുവീണത്. അപ്രതീക്ഷിതമായ ഈ ദുരന്തവാർത്ത നാട്ടുകാരെയും സുഹൃത്തുക്കളെയും ഒരുപോലെ ഞെട്ടിച്ചു.

ജീവിതത്തിന്റെ പ്രതീക്ഷകളും സ്വപ്നങ്ങളും നിറഞ്ഞുനിൽക്കേണ്ട പ്രായത്തിലാണ് ഷാൽമിന്റെ അപ്രതീക്ഷിത വേർപാട്. ഇന്ത്യൻ സൈന്യത്തിൽ സേവനം അനുഷ്ഠിക്കണമെന്ന ആഗ്രഹത്തോടെ തയ്യാറെടുപ്പുകൾ നടത്തിവരികയായിരുന്നു യുവാവ്. ഇന്ത്യൻ സൈനിക ക്യാമ്പിൽനിന്ന് അഗ്നിവീർ വിഭാഗത്തിലേക്ക് തിരഞ്ഞെടുക്കപ്പെട്ട ഉദ്യോഗാർത്ഥിയായിരുന്നു ഷാൽമിൻ. രാജ്യത്തിന്റെ കാവൽക്കാരനാകാനുള്ള സ്വപ്നം യാഥാർഥ്യമാകാനിരിക്കെയാണ് വിധി ആ യുവജീവിതത്തെ തട്ടിയെടുത്തത്.

കുടുംബത്തിന്റെയും നാട്ടുകാരുടെയും ഏറെ പ്രതീക്ഷയായിരുന്ന ഷാൽമിന്റെ വിയോഗം ബന്ധുക്കൾക്കും സുഹൃത്തുക്കൾക്കും വിശ്വസിക്കാനാകാത്ത ആഘാതമായി. കളിക്കളത്തിൽ നിറഞ്ഞുനിന്ന യുവാവിന്റെ ചിരിയും സൗഹൃദവും ഇനി ഓർമകളിൽ മാത്രമാകുമ്പോൾ നാടിനും തീരാനഷ്ടമാണ് ഈ വേർപാട്.സജീവന്റെയും ജിമിഷയുടെയും മകനാണ്. സഹോദരി: ഷാൻവിയ.

സംസ്കാരം ഇന്ന് വൈകിട്ട് നാലിന് വീട്ടുവളപ്പിൽ നടക്കും.

### Related Links & Sources
- [Original Story Source](https://panoor.truevisionnews.com/news/391592/panoor-shalmin-dies-collapsing-football-game)