---
title: "നെടുമ്പാശ്ശേരി മിനി കൂപ്പർ വാഹനാപകട കേസിൽ സുഹൈൽ സജീവ് ഒഴികെയുള്ള മൂന്ന് പ്രതികൾക്ക് ജാമ്യം"
english_title: "Nedumbassery Mini Cooper Accident Case Bail Three Accused"
publisher: "panoornews.in"
canonical_url: "https://panoor.truevisionnews.com/news/390483/nedumbassery-mini-cooper-accident-bail-three-accused"
published_at: "2026-11-06T13:58:00+05:30"
category: "News"
language: "ml"
image: "https://cf.zdn.im/img/truevisionnews.com/0/image-uploads/6aed9019f345d_Untitled-6_copy.jpg"
keywords: ["Nedumbassery Mini Cooper Accident", "Suhail Sajeev Bail", "High Court Kerala", "Nedumbassery Accident", "Mini Cooper Overspeed"]
---

# നെടുമ്പാശ്ശേരി മിനി കൂപ്പർ വാഹനാപകട കേസിൽ സുഹൈൽ സജീവ് ഒഴികെയുള്ള മൂന്ന് പ്രതികൾക്ക് ജാമ്യം

> **Lead Summary:** കൊച്ചി: നെടുമ്പാശ്ശേരി മിനി കൂപ്പര്‍ വാഹനാപകട കേസില്‍ സുഹൈല്‍ സജീവ് ഒഴികെയുള്ള മൂന്ന് പ്രതികള്‍ക്ക് ജാമ്യം നല്‍കി ഹൈക്കോടതി. സുഹൈല്‍ സജീവിന് പത്ത് ദിവസത്തിന് ശേഷം ജാമ്യം നല്‍കുമെന്നും ഹൈക്കോടതി വ്യക്തമാക്കി.

## Article Content

കൊച്ചി: നെടുമ്പാശ്ശേരി മിനി കൂപ്പര്‍ വാഹനാപകട കേസില്‍ സുഹൈല്‍ സജീവ് ഒഴികെയുള്ള മൂന്ന് പ്രതികള്‍ക്ക് ജാമ്യം നല്‍കി ഹൈക്കോടതി. സുഹൈല്‍ സജീവിന് പത്ത് ദിവസത്തിന് ശേഷം ജാമ്യം നല്‍കുമെന്നും ഹൈക്കോടതി വ്യക്തമാക്കി.

നാല് പ്രതികളുടെ ജാമ്യാപേക്ഷയിലാണ് ഹൈക്കോടതി തീരുമാനം. സുഹൈലിന് പുറമെയുള്ള നിനവ്, ജോയല്‍, അമീന്‍ എന്നീ പ്രതികള്‍ക്കാണ് ഇന്ന് ജാമ്യം അനുവദിച്ചത്.

അപകടം ദൗര്‍ഭാഗ്യകരമെന്ന് ചൂണ്ടിക്കാട്ടിയ ഹൈക്കോടതി എല്ലാ തെളിവുകളും ശേഖരിച്ചല്ലോ എന്നും ചോദിച്ചു. ഒരു മാസമായി പ്രതികള്‍ റിമാന്‍ഡിലെന്നും കോടതി നിരീക്ഷിച്ചു. കസ്റ്റഡിയില്‍ തുടരാന്‍ മതിയായ കാരണം വേണമെന്നും പൊതുബോധത്തിന് അനുസരിച്ച് തീരുമാനമെടുക്കാനാവില്ലെന്നും കോടതി പറഞ്ഞു.

നിയമവും നടപടിക്രമങ്ങളും നോക്കിയാണ് തീരുമാനമെടുത്തതെന്നും ഹൈക്കോടതി ചൂണ്ടിക്കാട്ടി. അതേസമയം പ്രതികളുടെ ജാമ്യാപേക്ഷയെ പ്രൊസിക്യൂഷന്‍ എതിര്‍ത്തിരുന്നു. തെളിവ് ഇനിയും ശേഖരിക്കാനുണ്ടെന്നും മൊഴി നല്‍കാന്‍ ആരും മുന്നോട്ട് വരില്ലെന്നും പ്രോസിക്യൂഷന്‍ ചൂണ്ടിക്കാട്ടി.പത്ത് ദിവസത്തിനകം അന്വേഷണം പൂര്‍ത്തിയാക്കാം എന്നും പ്രോസിക്യൂഷന്‍ കോടതിയെ അറിയിച്ചു.

പ്രതികളുടെ ജാമ്യാപേക്ഷ മുമ്പ് രണ്ട് തവണ തള്ളിയിരുന്നു. എറണാകുളം അഡീഷണല്‍ സെഷന്‍സ് കോടതിയും അങ്കമാലി കോടതിയുമാണ് ജാമ്യാപേക്ഷ തള്ളിയിരുന്നത്. അതേസമയം സുഹൈല്‍ സജീവ് ഓടിച്ച മിനി കൂപ്പര്‍ വാഹനം അമിത വേഗത്തിലായിരുന്നു എന്ന് നേരത്തെ സ്ഥിരീകരിച്ചിരുന്നു. ബിഎംഡബ്ലൂ കമ്പനിയുടെ സാങ്കേതിക പരിശോധനയിലാണ് അമിത വേഗം സ്ഥിരീകരിച്ചത്.

അപകടത്തിന് അഞ്ച് സെക്കന്‍ഡ് മുമ്പ് വരെ വാഹനത്തിന്റെ വേഗത 162 കിലോമീറ്റര്‍ ആയിരുന്നു. കൂട്ടിയിടിയുടെ സമയത്ത് വാഹനത്തിന്റെ വേഗത144 കിലോ മീറ്റര്‍ ആയിരുന്നെന്നുമാണ് കണ്ടെത്തല്‍. വാഹനത്തിന്റെ അഡ്വാന്‍സ്ഡ് ക്രാഷ് സേഫ്റ്റി മൊഡ്യൂളില്‍ (ACSM) നിന്ന് ലഭിച്ചവിവരങ്ങളുടെ അടിസ്ഥാനത്തിലാണ് റിപ്പോര്‍ട്ട്. സാങ്കേതിക പരിശോധന റിപ്പോര്‍ട്ട് ബിഎംഡബ്ല്യു ഇന്ത്യ അന്വേഷണ സംഘത്തിന് കൈമാറിയിരുന്നു. അപകടത്തിന് ഒരു സെക്കന്റ് മുമ്പ് മാത്രമാണ് ബ്രേക്ക് ഉപയോഗിച്ചതെന്നു റിപ്പോര്‍ട്ടിലുണ്ടായിരുന്നു.

ഒക്ടോബര്‍ 10ന് പുലര്‍ച്ചെ പന്ത്രണ്ടരയോടെയായിരുന്നു മദ്യലഹരിയില്‍ സുഹൈല്‍ സജീവ് ഓടിച്ച മിനി കൂപ്പര്‍ കാര്‍ മൂന്നുപേര്‍ സഞ്ചരിച്ചിരുന്ന സ്‌കൂട്ടറില്‍ ഇടിച്ചത്. വയനാട് സ്വദേശി ദേവിക, പാലക്കാട് സ്വദേശി ഗോപിക, കര്‍ണാടക സുള്ള്യ സ്വദേശി ഇയാസ് എന്നിവര്‍ അപകടത്തില്‍ തല്‍ക്ഷണം മരിച്ചിരുന്നു. തൃക്കാക്കര കരകൗശല വില്‍പ്പനശാലയില്‍ പാര്‍ട്ട് ടൈം ജോലി ചെയ്യുന്നവരായിരുന്നു മരിച്ച മൂന്ന് വിദ്യാര്‍ത്ഥികളും. സ്ഥാപനത്തിലെ സഹപ്രവര്‍ത്തകര്‍ക്കൊപ്പം രാത്രിയില്‍ ചായ കുടിച്ച് മടങ്ങിവരവെയാണ് അപകടമുണ്ടായത്.

English Summary: High Court granted bail to three accused except Suhail Sajeev in Nedumbassery Mini Cooper accident case. Court said Suhail Sajeev will get bail after ten days. Bail granted to Ninav, Joel and Ameen. Court observed accident was unfortunate, all evidence collected, accused in remand for one month, need sufficient reason to continue custody, decision cannot be based on public sentiment, decision taken as per law and procedure. Prosecution opposed bail, said evidence still to be collected and no one will come forward to give statement, investigation can be completed within ten days. Bail pleas were earlier rejected twice by Ernakulam Additional Sessions Court and Angamaly Court. BMW technical inspection confirmed Mini Cooper driven by Suhail Sajeev was overspeeding. Speed was 162 kmph till five seconds before accident, 144 kmph at collision time, based on Advanced Crash Safety Module data. Brake was applied only one second before accident. On October 10 at around 12.30 am, Mini Cooper driven by Suhail Sajeev under influence of alcohol hit scooter with three persons. Devika of Wayanad, Gopika of Palakkad and Iyas of Sullia, Karnataka died on spot. Three deceased students were part-time workers at Thrikkakara handicraft sales shop and were returning after having tea with colleagues.

### Related Links & Sources
- [Original Story Source](https://panoor.truevisionnews.com/news/390483/nedumbassery-mini-cooper-accident-bail-three-accused)