---
title: "ബൈപ്പാസ് റോഡിൽ ഇന്റർലോക്ക് പ്രവൃത്തി ഇഴയുന്നു ; പാനൂർ ടൗണിൽ രൂക്ഷമായ ഗതാഗതക്കുരുക്ക്, യാത്രക്കാർ ദുരിതത്തിൽ"
english_title: "Panoor Bypass Road Interlock Work Delay Causes Severe Traffic Jam in Town"
publisher: "panoornews.in"
canonical_url: "https://panoor.truevisionnews.com/news/382987/panoor-bypass-road-interlock-work-delay-traffic-jam"
published_at: "2026-09-16T20:36:00+05:30"
category: "Panoor Special"
language: "ml"
image: "https://cf.zdn.im/img/truevisionnews.com/0/image-uploads/6aaab5b418416_panoor-bypass-road-interlock-work-delay-traffic-jam.jpg"
keywords: ["Panoor", "Panoor Bypass", "Traffic Jam", "Interlock Work", "Panoor Town"]
---

# ബൈപ്പാസ് റോഡിൽ ഇന്റർലോക്ക് പ്രവൃത്തി ഇഴയുന്നു ; പാനൂർ ടൗണിൽ രൂക്ഷമായ ഗതാഗതക്കുരുക്ക്, യാത്രക്കാർ ദുരിതത്തിൽ

> **Lead Summary:** പാനൂർ:പാനൂർ ബൈപ്പാസ് റോഡിൽ ഇന്റർലോക്ക് പ്രവൃത്തി ഇഴഞ്ഞുനീങ്ങുന്നതിനാൽ പാനൂർ ടൗണിൽ രൂക്ഷമായ ഗതാഗതക്കുരുക്ക്. ടൗൺ കടന്നുപോകാൻ വാഹനങ്ങൾ ഏറെ നേരം റോഡിൽ കാത്തുകിടക്കേണ്ട അവസ്ഥയാണ് നിലവിലുള്ളത്. ബൈപ്പാസ് റോഡിൽ പ്രവൃത്തി ആരംഭിച്ചതോടെയാണ് നഗരത്തിലെ ഗതാഗതം കൂടുതൽ ദുഷ്കരമായത്.

## Article Content

പാനൂർ:പാനൂർ ബൈപ്പാസ് റോഡിൽ ഇന്റർലോക്ക് പ്രവൃത്തി ഇഴഞ്ഞുനീങ്ങുന്നതിനാൽ പാനൂർ ടൗണിൽ രൂക്ഷമായ ഗതാഗതക്കുരുക്ക്. ടൗൺ കടന്നുപോകാൻ വാഹനങ്ങൾ ഏറെ നേരം റോഡിൽ കാത്തുകിടക്കേണ്ട അവസ്ഥയാണ് നിലവിലുള്ളത്. ബൈപ്പാസ് റോഡിൽ പ്രവൃത്തി ആരംഭിച്ചതോടെയാണ് നഗരത്തിലെ ഗതാഗതം കൂടുതൽ ദുഷ്കരമായത്.

ഒരാഴ്ച മുമ്പാണ് ബൈപ്പാസ് റോഡിൽ ഇന്റർലോക്ക് പ്രവൃത്തി ആരംഭിച്ചത്. ഏകദേശം 600 മീറ്റർ ദൂരത്തിലാണ് ഇന്റർലോക്ക് പാകേണ്ടത്. എന്നാൽ തിരക്കേറിയ റോഡിലെ പ്രവൃത്തി യുദ്ധകാലാടിസ്ഥാനത്തിൽ പൂർത്തിയാക്കേണ്ടതുണ്ടെങ്കിലും ഇഴഞ്ഞുനീങ്ങുകയാണെന്ന ആക്ഷേപം ശക്തമാണ്. പ്രവൃത്തി വേഗത്തിൽ പൂർത്തിയാക്കാത്തത് ടൗണിലെ ഗതാഗതക്കുരുക്ക് കൂടുതൽ രൂക്ഷമാക്കുന്നതായും യാത്രക്കാർ പറയുന്നു.

തിരക്കേറിയ സമയങ്ങളിൽ പാനൂർ ജംഗ്ഷനിൽ വാഹനങ്ങളുടെ നീണ്ട നിരയാണ് രൂപപ്പെടുന്നത്. പൊലീസ് സ്റ്റേഷൻ പരിസരത്തുനിന്ന് ടൗണിലേക്കും ഗതാഗതക്കുരുക്ക് അനുഭവപ്പെടുന്നുണ്ട്. കൂത്തുപറമ്പ് റോഡിൽ ഗുരുസന്നിധി വരെയും തലശ്ശേരി റോഡിൽ വെസ്റ്റ് യു.പി. സ്കൂൾ വരെയും വാഹനങ്ങളുടെ നിര നീളുന്ന സ്ഥിതിയാണ്. പ്രധാന റോഡുകളിലെ ഗതാഗതം മന്ദഗതിയിലാകുന്നതോടെ നഗരത്തിലെ മറ്റ് റോഡുകളിലും വാഹനത്തിരക്ക് വർധിക്കുകയാണ്.

ഗതാഗതക്കുരുക്ക് ഏറ്റവും കൂടുതൽ ബാധിക്കുന്നത് വിദ്യാർത്ഥികളെയും സമയബന്ധിതമായി യാത്ര ചെയ്യേണ്ടവരെയുമാണ്. സ്കൂൾ സമയങ്ങളിലും വൈകുന്നേരങ്ങളിലും ഗതാഗതക്കുരുക്ക് രൂക്ഷമാകുന്നതിനാൽ വിദ്യാർത്ഥികളെ കൃത്യസമയത്ത് സ്കൂളുകളിലെത്തിക്കാനും തിരിച്ചെത്തിക്കാനും ഏറെ ബുദ്ധിമുട്ട് നേരിടുന്നതായി ഡ്രൈവർമാർ പറയുന്നു.

ഓട്ടോറിക്ഷാ യാത്രക്കാരെയും ഗതാഗതക്കുരുക്ക് സാമ്പത്തികമായി ബാധിക്കുന്നുണ്ട്. സാധാരണയായി 30 രൂപയ്ക്ക് പൂർത്തിയാക്കാവുന്ന ഓട്ടത്തിന് ഗതാഗതക്കുരുക്കിനെ തുടർന്ന് 70 രൂപ വരെ ചെലവാകുന്ന സാഹചര്യമാണ് പലപ്പോഴും ഉണ്ടാകുന്നതെന്ന് ഡ്രൈവർമാർ പറയുന്നു. ഇന്ധനച്ചെലവിനൊപ്പം അധിക സമയം റോഡിൽ ചെലവഴിക്കേണ്ടിവരുന്നതും ഡ്രൈവർമാർക്ക് സാമ്പത്തിക ബാധ്യതയാകുന്നു.

ബസ് ജീവനക്കാരുടെയും സ്ഥിതി വ്യത്യസ്തമല്ല. ബൈപ്പാസ് റോഡ് അടച്ചതോടെ കിഴക്കുഭാഗത്തുനിന്ന് എത്തുന്ന ബസുകൾ ഉൾപ്പെടെ കൂടുതൽ വാഹനങ്ങൾ പാനൂർ ജംഗ്ഷൻ വഴിയാണ് കടന്നുപോകുന്നത്. ഇതോടെ നേരത്തെ തന്നെ തിരക്കേറിയിരുന്ന നഗരഭാഗത്ത് വാഹനങ്ങളുടെ എണ്ണം വർധിച്ചു. ജംഗ്ഷനിൽ വാഹനങ്ങൾ ഏറെ നേരം കാത്തുകിടക്കേണ്ട സാഹചര്യമാണുള്ളതെന്ന് ബസ് ജീവനക്കാരും പറയുന്നു.

600 മീറ്റർ മാത്രം ദൂരത്തിലുള്ള ഇന്റർലോക്ക് പ്രവൃത്തി കൂടുതൽ തൊഴിലാളികളെ ഉപയോഗിച്ച് വേഗത്തിൽ പൂർത്തിയാക്കണമെന്നാണ് നാട്ടുകാരുടെ ആവശ്യം. നിലവിലെ വേഗതയിൽ പ്രവൃത്തി തുടർന്നാൽ ഗതാഗതപ്രശ്നം ദീർഘകാലം തുടരുമെന്ന ആശങ്കയും ഉയരുന്നുണ്ട്. റോഡ് പ്രവൃത്തി പൂർത്തിയാകുന്നതുവരെ ഗതാഗതക്കുരുക്ക് നിയന്ത്രിക്കാൻ പാനൂർ ടൗണിൽ കൂടുതൽ പൊലീസ് ഉദ്യോഗസ്ഥരെ നിയോഗിക്കണമെന്നും രാവിലെയും വൈകുന്നേരങ്ങളിലും കാര്യക്ഷമമായ ഗതാഗതനിയന്ത്രണം വേണമെന്നും നാട്ടുകാർ ആവശ്യപ്പെടുന്നു.

English Summary: Severe traffic congestion is troubling Panoor town as interlock work on the 600-meter-long bypass road, started a week ago, is progressing slowly. Vehicles are stuck for long hours, with queues extending from Police Station to Gurusannidhi on Koothuparamba road and up to West UP School on Thalassery road. Students, office-goers, auto drivers and bus staff are worst affected. Auto fares have risen from Rs 30 to Rs 70 due to delay. Locals demand more workers to speed up work and deployment of more police for traffic control.

### Related Links & Sources
- [Original Story Source](https://panoor.truevisionnews.com/news/382987/panoor-bypass-road-interlock-work-delay-traffic-jam)