---
title: "കുട്ടികളുടെ സർഗ്ഗലോകത്തിന് വർണപ്പകിട്ട്; കതിരൂരിൽ 'വർണ്ണക്കിനാവ്' ചിത്രോത്സവത്തിന് തുടക്കമായി"
english_title: "Kathiroor Varnnakinavu Art Exhibition Kids Paintings"
publisher: "panoornews.in"
canonical_url: "https://panoor.truevisionnews.com/news/376555/kathiroor-varnnakinavu-art-exhibition-kids-paintings"
published_at: "2026-08-04T13:40:00+05:30"
category: "News"
language: "ml"
image: "https://cf.zdn.im/img/truevisionnews.com/0/image-uploads/6a719eee98a22_kathiroor-varnnakinavu-kids-art-exhibition.jpg"
keywords: ["Kathiroor", "Varnnakinavu", "Art Exhibition", "Crimson Art Hub", "Sreelatha Nambiar"]
---

# കുട്ടികളുടെ സർഗ്ഗലോകത്തിന് വർണപ്പകിട്ട്; കതിരൂരിൽ 'വർണ്ണക്കിനാവ്' ചിത്രോത്സവത്തിന് തുടക്കമായി

> **Lead Summary:** കതിരൂർ: കുട്ടികളുടെ സർഗ്ഗാത്മകതയും കലാപ്രതിഭയും പൊതുസമൂഹത്തിന് മുന്നിലെത്തിക്കുന്ന 'വർണ്ണക്കിനാവ്' ചിത്രപ്രദർശനത്തിന് കതിരൂർ ഗ്രാമപഞ്ചായത്ത് ആർട്ട് ഗാലറിയിൽ തുടക്കമായി. നവീകരിച്ച ആർട്ട് ഗാലറിയിലെ 104-ാമത് കലാപ്രദർശനമായാണ് ക്രിമ്സൺ ആർട്ട് ഹബ്ബിന്റെ നേതൃത്വത്തിൽ ചിത്രകാരി ശ്രീലത നമ്പ്യാർ ഒരുക്കുന്ന പ്രദർശനം ആരംഭിച്ചത്.

## Article Content

കതിരൂർ: കുട്ടികളുടെ സർഗ്ഗാത്മകതയും കലാപ്രതിഭയും പൊതുസമൂഹത്തിന് മുന്നിലെത്തിക്കുന്ന 'വർണ്ണക്കിനാവ്' ചിത്രപ്രദർശനത്തിന് കതിരൂർ ഗ്രാമപഞ്ചായത്ത് ആർട്ട് ഗാലറിയിൽ തുടക്കമായി. നവീകരിച്ച ആർട്ട് ഗാലറിയിലെ 104-ാമത് കലാപ്രദർശനമായാണ് ക്രിമ്സൺ ആർട്ട് ഹബ്ബിന്റെ നേതൃത്വത്തിൽ ചിത്രകാരി ശ്രീലത നമ്പ്യാർ ഒരുക്കുന്ന പ്രദർശനം ആരംഭിച്ചത്.

ഗ്രാമപഞ്ചായത്ത് ആരോഗ്യ-വിദ്യാഭ്യാസ സ്ഥിരം സമിതി അധ്യക്ഷ ഷോസ്‌ന സുജിത്തിന്റെ അധ്യക്ഷതയിൽ തിങ്കളാഴ്ച വൈകിട്ട് നടന്ന ചടങ്ങിൽ പ്രശസ്ത ചിത്രകാരനും അധ്യാപകനുമായ ധനേഷ് നമ്പ്യാർ പ്രദർശനം ഉദ്ഘാടനം ചെയ്തു. ചിത്രകാരൻ വിനോദ്കുമാർ എം വിശിഷ്ടാതിഥിയായി പങ്കെടുത്തു.

കവയിത്രിയും അധ്യാപികയുമായ രൂപ രാജേന്ദ്രൻ, ചിത്രകാരി പുഷ്പ ദിനേശൻ, ചിത്രകാരന്മാരായ ടി. ഭരതൻ, സുശാന്ത് കൊല്ലറക്കൽ എന്നിവർ ആശംസകൾ നേർന്ന് സംസാരിച്ചു. പ്രദർശനത്തിന്റെ കോ-ഓർഡിനേറ്ററുമായ ചിത്രകാരി ശ്രീലത നമ്പ്യാർ സ്വാഗതവും നന്ദിയും രേഖപ്പെടുത്തി.

എൽ.കെ.ജി മുതൽ ഒൻപതാം ക്ലാസ് വരെയുള്ള 38 കുട്ടികളുടെ ചിത്രങ്ങളാണ് പ്രദർശനത്തിൽ ഉൾപ്പെടുത്തിയിരിക്കുന്നത്. ഇവരിൽ 12 പേർ ഭിന്നശേഷിക്കാരാണെന്നത് പ്രദർശനത്തിന്റെ മറ്റൊരു പ്രത്യേകതയാണ്. ജലച്ചായം, അക്രിലിക്, പെൻസിൽ, ഫാബ്രിക്, ഇങ്ക്, ക്രയോൺസ് തുടങ്ങി വിവിധ മാധ്യമങ്ങളിലായി ഒരുക്കിയ 500-ലധികം ചിത്രങ്ങൾ ആർട്ട് ഗാലറിയെ വർണാഭമായ ചിത്രോത്സവമാക്കി മാറ്റുന്നു.

കുട്ടികളുടെ ഭാവനയും കലാസൃഷ്ടികളോടുള്ള അഭിനിവേശവും പ്രോത്സാഹിപ്പിക്കുക എന്ന ലക്ഷ്യത്തോടെ സംഘടിപ്പിച്ചിരിക്കുന്ന 'വർണ്ണക്കിനാവ്' ആറ് ദിവസം നീണ്ടുനിൽക്കുന്ന ചിത്രോത്സവമാണ്. ആഗസ്റ്റ് 8-ന് ശനിയാഴ്ച പ്രദർശനം സമാപിക്കും. കലാസ്നേഹികൾക്കും വിദ്യാർഥികൾക്കും കുടുംബങ്ങൾക്കും ഒരുപോലെ ആസ്വദിക്കാവുന്ന ഈ ചിത്രോത്സവം കതിരൂരിന്റെ സാംസ്കാരിക രംഗത്തിന് പുതിയ ഉണർവേകുമെന്നാണ് സംഘാടകരുടെ പ്രതീക്ഷ.

### Related Links & Sources
- [Original Story Source](https://panoor.truevisionnews.com/news/376555/kathiroor-varnnakinavu-art-exhibition-kids-paintings)