---
title: "വ്യാപാരി വ്യവസായി വെൽഫയർ സഹകരണ സംഘത്തിന്റെ പേരിൽ നടന്ന തട്ടിപ്പ് ; ചെണ്ടയാട് സ്വദേശിക്ക് നഷ്ടമായത് 11 ലക്ഷം രൂപ"
english_title: "Thalassery Traders Welfare Cooperative Scam: Rs 11 Lakh Lost, 5th Case Registered"
publisher: "panoornews.in"
canonical_url: "https://panoor.truevisionnews.com/news/374451/thalassery-traders-welfare-cooperative-scam-rs-11-lakh-lost-5th-case-registered"
published_at: "2026-07-25T08:13:00+05:30"
category: "News"
language: "ml"
image: "https://cf.zdn.im/img/truevisionnews.com/0/image-uploads/6a6423785a309_thalassery-traders-welfare-cooperative.jpg"
keywords: ["Thalassery", "Investment Fraud", "Traders Welfare Cooperative", "Financial Scam", "Police"]
---

# വ്യാപാരി വ്യവസായി വെൽഫയർ സഹകരണ സംഘത്തിന്റെ പേരിൽ നടന്ന തട്ടിപ്പ് ; ചെണ്ടയാട് സ്വദേശിക്ക് നഷ്ടമായത് 11 ലക്ഷം രൂപ

> **Lead Summary:** ചെണ്ടയാട്: തലശ്ശേരി ഒ.വി. റോഡിൽ പ്രവർത്തിച്ചിരുന്ന വ്യാപാരി വ്യവസായി വെൽഫെയർ സഹകരണ സംഘത്തിന്റെ പേരിൽ കോടിക്കണക്കിന് രൂപയുടെ നിക്ഷേപ തട്ടിപ്പ് നടന്നെന്ന കേസിൽ വീണ്ടും പരാതി. ചെണ്ടയാട് സ്വദേശിനി പി.കെ. ഷീജി നൽകിയ പരാതിയിലാണ് തലശ്ശേരി പൊലീസ് പുതിയ കേസ് രജിസ്റ്റർ ചെയ്തത്. ഇതോടെ തട്ടിപ്പിൽ പൊലീസിന് ലഭിച്ച പരാതി അഞ്ചായി.

## Article Content

ചെണ്ടയാട്: തലശ്ശേരി ഒ.വി. റോഡിൽ പ്രവർത്തിച്ചിരുന്ന വ്യാപാരി വ്യവസായി വെൽഫെയർ സഹകരണ സംഘത്തിന്റെ പേരിൽ കോടിക്കണക്കിന് രൂപയുടെ നിക്ഷേപ തട്ടിപ്പ് നടന്നെന്ന കേസിൽ വീണ്ടും പരാതി. ചെണ്ടയാട് സ്വദേശിനി പി.കെ. ഷീജി നൽകിയ പരാതിയിലാണ് തലശ്ശേരി പൊലീസ് പുതിയ കേസ് രജിസ്റ്റർ ചെയ്തത്. ഇതോടെ തട്ടിപ്പിൽ പൊലീസിന് ലഭിച്ച പരാതി അഞ്ചായി.

പരാതി പ്രകാരം, 2026 ഏപ്രിൽ 20 മുതൽ 22 വരെ വിവിധ ഘട്ടങ്ങളിലായി അമിത പലിശ വാഗ്ദാനം ചെയ്ത് 11.10 ലക്ഷം രൂപ നിക്ഷേപമായി സ്വീകരിച്ചു. എന്നാൽ നിക്ഷേപ കാലാവധി കഴിഞ്ഞിട്ടും പരാതിക്കാരിക്ക് പണമോ വാഗ്ദാനം ചെയ്ത പലിശയോ തിരികെ നൽകിയില്ലെന്നാണ് ആരോപണം. തുടർന്ന് സ്ഥാപനം പ്രവർത്തനം അവസാനിപ്പിക്കുകയും ബന്ധപ്പെട്ടവർ ഒളിവിൽ പോകുകയായിരുന്നുവെന്നും പരാതിയിൽ പറയുന്നു.

ഈ പരാതിയോടുകൂടി വ്യാപാരി വ്യവസായി വെൽഫെയർ സഹകരണ സംഘവുമായി ബന്ധപ്പെട്ട് തലശ്ശേരി പൊലീസിൽ രജിസ്റ്റർ ചെയ്ത കേസുകളുടെ എണ്ണം അഞ്ചായി. സംഘത്തിന്റെ സെക്രട്ടറി ജോജിഷിനെയും ഭരണസമിതി അംഗങ്ങളെയും പ്രതിചേർത്താണ് പൊലീസ് കേസ് എടുത്തിരിക്കുന്നത്.

കേസിലെ മുഖ്യപ്രതിയായ സെക്രട്ടറി ജോജിഷ് സംഭവം പുറത്തുവന്നതിന് പിന്നാലെ ഒളിവിൽ പോയിരുന്നു. പ്രത്യേക അന്വേഷണസംഘം നടത്തിയ അന്വേഷണത്തിനൊടുവിൽ തമിഴ്നാട്ടിലെ രാമേശ്വരത്ത് നിന്നാണ് ഇയാളെ പിടികൂടിയത്. കോടതിയിൽ ഹാജരാക്കിയ പ്രതിയെ നിലവിൽ റിമാൻഡിൽ കഴിയുകയാണ്.

അതേസമയം, നിക്ഷേപ തട്ടിപ്പിൽ ഇരയായവരും അവരുടെ കുടുംബാംഗങ്ങളും കഴിഞ്ഞ ദിവസം തലശ്ശേരിയിലെ വ്യാപാര ഭവന് മുന്നിൽ ധർണാ സമരം സംഘടിപ്പിച്ചിരുന്നു. തട്ടിപ്പിനിരയായവരുടെ മുഴുവൻ നിക്ഷേപവും തിരിച്ചുനൽകുക, കേസിലെ മുഴുവൻ പ്രതികളെയും നിയമത്തിന് മുന്നിൽ കൊണ്ടുവരുക, തട്ടിപ്പിന്റെ സമഗ്ര അന്വേഷണം നടത്തി മുഴുവൻ വസ്തുതകളും പുറത്തുകൊണ്ടുവരിക എന്നീ ആവശ്യങ്ങൾ ഉന്നയിച്ചായിരുന്നു സമരം.

കേസിൽ കൂടുതൽ പരാതികൾ ലഭിക്കാനുള്ള സാധ്യത പൊലീസ് തള്ളിക്കളയുന്നില്ല. നിക്ഷേപകരിൽ നിന്ന് കൂടുതൽ വിവരങ്ങൾ ശേഖരിച്ചുവരികയാണെന്നും സാമ്പത്തിക ഇടപാടുകളുടെ വിശദാംശങ്ങൾ പരിശോധിച്ച് അന്വേഷണം വ്യാപിപ്പിക്കുമെന്നും അന്വേഷണ ഉദ്യോഗസ്ഥർ അറിയിച്ചു. കോടിക്കണക്കിന് രൂപയുടെ നിക്ഷേപ തട്ടിപ്പാണ് നടന്നതെന്നാണ് പ്രാഥമിക വിലയിരുത്തൽ. അന്വേഷണം പുരോഗമിക്കുന്ന സാഹചര്യത്തിൽ കൂടുതൽ പ്രതികളെ ഉൾപ്പെടുത്താനും പുതിയ വകുപ്പുകൾ ചുമത്താനും സാധ്യതയുണ്ടെന്നാണ് സൂചന.

### Related Links & Sources
- [Original Story Source](https://panoor.truevisionnews.com/news/374451/thalassery-traders-welfare-cooperative-scam-rs-11-lakh-lost-5th-case-registered)