---
title: "കോഴിക്കോട് മെഡിക്കൽ കോളേജിൽ 16 ദിവസം പ്രായമുള്ള പെൺകുഞ്ഞിനെ ഉപേക്ഷിച്ച് മാതാവ് മുങ്ങി; പോലീസ് അന്വേഷണം"
english_title: "Kozhikode Medical College: Mother Abandons 16-Day-Old Baby Girl, Police Launch Probe"
publisher: "panoornews.in"
canonical_url: "https://panoor.truevisionnews.com/news/374428/kozhikode-medical-college-mother-abandons-16-day-old-baby-girl-police-launch-probe"
published_at: "2026-07-24T21:15:00+05:30"
category: "News"
language: "ml"
image: "https://panoor.truevisionnews.com/image-uploads/6a63895722ab0_Untitled-5_copy.jpg"
keywords: []
---

# കോഴിക്കോട് മെഡിക്കൽ കോളേജിൽ 16 ദിവസം പ്രായമുള്ള പെൺകുഞ്ഞിനെ ഉപേക്ഷിച്ച് മാതാവ് മുങ്ങി; പോലീസ് അന്വേഷണം

> **Lead Summary:** കോഴിക്കോട്: മെഡിക്കൽ കോളേജ് ആശുപത്രിയിൽ പ്രസവിച്ച് 16 ദിവസം പ്രായമുള്ള പെൺകുഞ്ഞിനെ ഉപേക്ഷിച്ച് മാതാവ് കടന്നുകളഞ്ഞതായി പരാതി. വെള്ളിയാഴ്ച വൈകീട്ടാണ് സംഭവം.

## Article Content

കോഴിക്കോട്: മെഡിക്കൽ കോളേജ് ആശുപത്രിയിൽ പ്രസവിച്ച് 16 ദിവസം പ്രായമുള്ള പെൺകുഞ്ഞിനെ ഉപേക്ഷിച്ച് മാതാവ് കടന്നുകളഞ്ഞതായി പരാതി. വെള്ളിയാഴ്ച വൈകീട്ടാണ് സംഭവം.

വയനാട് സ്വദേശിനിയായ ഷാഹിന എന്ന യുവതിയാണ് കുഞ്ഞിനെ ഉപേക്ഷിച്ചത്. കുഞ്ഞിനെ അപരിചിതയായ മറ്റൊരു സ്ത്രീയുടെ കൈയിൽ ഏൽപ്പിച്ച ശേഷം ആശുപത്രി പരിസരത്ത് നിന്ന് ഇവർ മുങ്ങുകയായിരുന്നു എന്നാണ് പോലീസിന് ലഭിച്ച പ്രാഥമിക വിവരം.

കുഞ്ഞിനെ കൈയിൽ കിട്ടിയ സ്ത്രീ ഉടൻ മെഡിക്കൽ കോളേജ് പോലീസ് സ്റ്റേഷനിലെത്തി വിവരം അറിയിച്ചു. ഇതോടെയാണ് സംഭവം പുറത്തറിയുന്നത്. പോലീസ് ഉടൻ ഇടപെട്ട് കുഞ്ഞിനെ വനിതാ പോലീസിന്റെ സംരക്ഷണയിൽ മാതൃശിശു സംരക്ഷണ കേന്ദ്രത്തിലേക്ക് മാറ്റി.

അവിടെ ആവശ്യമായ മെഡിക്കൽ പരിശോധനകൾക്കും ആരോഗ്യ പരിശോധനകൾക്കും ശേഷം കുഞ്ഞിനെ വീണ്ടും പോലീസ് സ്റ്റേഷനിലേക്ക് കൊണ്ടുവന്നു. കുഞ്ഞിന്റെ ആരോഗ്യനില തൃപ്തികരമാണെന്ന് അധികൃതർ അറിയിച്ചു.

കുഞ്ഞിന്റെ മാതാവ് ആശുപത്രിയിൽ രേഖപ്പെടുത്തിയ ഫോൺ നമ്പറിൽ ബന്ധപ്പെടാൻ ശ്രമിച്ചെങ്കിലും ഫോൺ സ്വിച്ച് ഓഫ് ആയിരുന്നു. സംഭവത്തിൽ മെഡിക്കൽ കോളേജ് പോലീസ് കേസ് രജിസ്റ്റർ ചെയ്തു.

കുഞ്ഞിനെ ഉപേക്ഷിക്കാൻ കാരണമായ സാഹചര്യങ്ങൾ, മാതാവിന്റെ സ്ഥാനം, മറ്റ് ആളുകളുടെ പങ്കാളിത്തം എന്നിവയെല്ലാം പരിശോധിച്ചാണ് അന്വേഷണം. കുഞ്ഞിന്റെ മാതാവിനെ കണ്ടെത്താനുള്ള നടപടികൾ ഊർജിതമാക്കിയതായും പോലീസ് അറിയിച്ചു.

### Related Links & Sources
- [Original Story Source](https://panoor.truevisionnews.com/news/374428/kozhikode-medical-college-mother-abandons-16-day-old-baby-girl-police-launch-probe)