---
title: "ചങ്കിലെ ചങ്കിടിപ്പാണ്  മെസ്സിയും, അർജന്റീനയും ; ചമ്പാട് ആരാധകർ ഉയർത്തിയത് ഒരൊന്നൊന്നര  ബോർഡ്"
english_title: "Messi and Argentina; Champad fans raised   board"
publisher: "panoornews.in"
canonical_url: "https://panoor.truevisionnews.com/news/368002/messi-and-argentina-champad-fans-raised-board"
published_at: "2026-06-24T11:38:00+05:30"
category: "Panoor Special"
language: "ml"
image: "https://cf.zdn.im/img/truevisionnews.com/0/image-uploads/6a3b749c41292_Untitled-3_copy.jpg"
keywords: ["Messi", "Argentina", "Champad", "Fans"]
---

# ചങ്കിലെ ചങ്കിടിപ്പാണ്  മെസ്സിയും, അർജന്റീനയും ; ചമ്പാട് ആരാധകർ ഉയർത്തിയത് ഒരൊന്നൊന്നര  ബോർഡ്

> **Lead Summary:** ചമ്പാട്: ലോക ഫുട്ബോളിലെ ഇതിഹാസതാരമായ ലയണൽ മെസ്സി ലോകകപ്പ് ചരിത്രത്തിൽ ഏറ്റവും കൂടുതൽ ഗോൾ നേടിയ താരമെന്ന റെക്കോഡ് സ്വന്തമാക്കിയതിന്റെ ആവേശത്തിലാണ് ചമ്പാട്ടെ ഫുട്ബോൾ ആരാധകർ.

## Article Content

ചമ്പാട്: ലോക ഫുട്ബോളിലെ ഇതിഹാസതാരമായ ലയണൽ മെസ്സി ലോകകപ്പ് ചരിത്രത്തിൽ ഏറ്റവും കൂടുതൽ ഗോൾ നേടിയ താരമെന്ന റെക്കോഡ് സ്വന്തമാക്കിയതിന്റെ ആവേശത്തിലാണ് ചമ്പാട്ടെ ഫുട്ബോൾ ആരാധകർ.

അർജന്റീനയുടെ ഓസ്ട്രിയക്കെതിരായ 2-0 വിജയത്തിന് പിന്നാലെ ചമ്പാട് തോട്ടുമ്മലിൽ അർജന്റീന ടീമിന്റെ കൂറ്റൻ ഫ്ലക്സ് ബോർഡ് സ്ഥാപിച്ചാണ് ആരാധകർ ആഘോഷം സംഘടിപ്പിച്ചത്.ഏകദേശം 80 അടി ഉയരമുള്ള ഭീമൻ ബോർഡാണ് തോട്ടുമ്മലിൽ ഉയർന്നിരിക്കുന്നത്.

ജില്ലയിൽ തന്നെ ലോകകപ്പ് ആവേശത്തിന്റെ ഭാഗമായി സ്ഥാപിക്കപ്പെട്ട ഏറ്റവും വലിയ ബോർഡുകളിൽ ഒന്നായാണ് ഈ ബോർഡ് വിലയിരുത്തപ്പെടുന്നത്. ബോർഡ് സ്ഥാപിച്ചത് പ്രദേശവാസികളുടെയും, ഫുട്ബോൾ പ്രേമികളുടെയും ശ്രദ്ധ ആകർഷിച്ചിട്ടുണ്ട്.

രണ്ട് ആഴ്ചയിലേറെ നീണ്ട പരിശ്രമത്തിനൊടുവിലാണ് ബോർഡിന്റെ നിർമ്മാണവും സ്ഥാപിക്കലും പൂർത്തിയായത്. തോട്ടുമ്മലിലെ യുവധാര ക്ലബ് പ്രവർത്തകരും അർജന്റീനയുടെ കടുത്ത ആരാധകരുമായ അക്ഷയ് മനോഹരൻ, ആദർശ് രവീന്ദ്രൻ, പി. സായൂജ്, ഹർഷിൻ രാജ്, യു.കെ. അശ്വിൻ, കെ. സാഗർ, കെ.പി. ഋതുൽ, കെ. അർഷാദ് എന്നിവർ നേതൃത്വം നൽകി.

ലോകകപ്പ് മത്സരങ്ങൾ ആരംഭിച്ചതോടെ ചമ്പാട് പ്രദേശം ഫുട്ബോൾ ആവേശത്തിൽ മുങ്ങിയിരിക്കുകയാണ്. വിവിധ രാജ്യങ്ങളുടെ പതാകകളും ബോർഡുകളും ആരാധകർ സ്ഥാപിച്ചിട്ടുണ്ടെങ്കിലും അർജന്റീനയുടെ ഈ ഭീമൻ ഫ്ലക്സ് പ്രത്യേക ശ്രദ്ധ നേടിയിരിക്കുകയാണ്. മെസിയോടുള്ള ആരാധനയും അർജന്റീന ടീമിനോടുള്ള പിന്തുണയും പ്രകടിപ്പിക്കുന്നതാണ് ഈ ബോർഡെന്ന് സംഘാടകർ പറഞ്ഞു.

അതേസമയം, യുവധാര ക്ലബിൽ അർജന്റീന ആരാധകർ മാത്രമല്ല സജീവമായിരിക്കുന്നത്. ക്രിസ്റ്റ്യാനൊ റൊണാൾഡോയുടെ പോർച്ചുഗൽ ടീമിനും, നെയ്മറുടെ ബ്രസീൽ ടീമിനും ഇവിടെ വലിയ ആരാധക പിന്തുണയുണ്ട്. ഈ ടീമുകളെ പിന്തുണച്ചുകൊണ്ടുള്ള ഫ്ലക്സ് ബോർഡുകളും ആരാധകർ ഇതിനകം സ്ഥാപിച്ചിട്ടുണ്ട്.

ലോകകപ്പ് ആവേശം ദിനംപ്രതി വർധിക്കുന്നതിനിടെ, ചമ്പാട് തോട്ടുമ്മലിലെ ഈ ഭീമൻ ബോർഡ് ഫുട്ബോൾ ആരാധകരുടെ സംഗമ കേന്ദ്രമായും സെൽഫി പോയിന്റായും മാറിയിരിക്കുകയാണ്. മത്സരങ്ങൾ പുരോഗമിക്കുമ്പോൾ കൂടുതൽ ആഘോഷ പരിപാടികൾ സംഘടിപ്പിക്കാനുള്ള ഒരുക്കത്തിലാണ് ആരാധക കൂട്ടായ്മ.

### Related Links & Sources
- [Original Story Source](https://panoor.truevisionnews.com/news/368002/messi-and-argentina-champad-fans-raised-board)