---
title: "ഇരിട്ടി പാലത്തിൽ നിന്ന് പുഴയിലേക്ക് ചാടിയ യുവതിയെ സാഹസികമായി രക്ഷപ്പെടുത്തി ; രക്ഷാപ്രവർത്തനത്തിനിടെ ഇതരസംസ്ഥാന തൊഴിലാളിയും അവശനായി"
english_title: "A young woman who jumped into the river from the Iritty bridge was rescued"
publisher: "panoornews.in"
canonical_url: "https://panoor.truevisionnews.com/news/367593/a-young-woman-who-jumped-into-the-river-from-the-iritty-bridge-was-rescued"
published_at: "2026-06-22T14:38:00+05:30"
category: "News"
language: "ml"
image: "https://cf.zdn.im/img/truevisionnews.com/0/image-uploads/6a38fc627f937_Untitled-5_copy.jpg"
keywords: ["Woman", "Iritty bridge"]
---

# ഇരിട്ടി പാലത്തിൽ നിന്ന് പുഴയിലേക്ക് ചാടിയ യുവതിയെ സാഹസികമായി രക്ഷപ്പെടുത്തി ; രക്ഷാപ്രവർത്തനത്തിനിടെ ഇതരസംസ്ഥാന തൊഴിലാളിയും അവശനായി

> **Lead Summary:** ഇരിട്ടി പാലത്തിന് മുകളിൽ നിന്ന് പുഴയിലേക്ക് ചാടിയ യുവതിയെ നാട്ടുകാരും നിർമാണ തൊഴിലാളികളും ചേർന്ന് സാഹസികമായി രക്ഷപ്പെടുത്തി. ഇന്ന് രാവിലെയായിരുന്നു സംഭവം. പാലത്തിന് മുകളിൽ നിന്ന് യുവതി പുഴയിലേക്ക് ചാടുന്നത് കണ്ട ലോറി ഡ്രൈവറുടെ സമയോചിതമായ ഇടപെടലാണ് രക്ഷാപ്രവർത്തനത്തിന് വഴിയൊരുക്കിയത്.

## Article Content

ഇരിട്ടി പാലത്തിന് മുകളിൽ നിന്ന് പുഴയിലേക്ക് ചാടിയ യുവതിയെ നാട്ടുകാരും നിർമാണ തൊഴിലാളികളും ചേർന്ന് സാഹസികമായി രക്ഷപ്പെടുത്തി. ഇന്ന് രാവിലെയായിരുന്നു സംഭവം. പാലത്തിന് മുകളിൽ നിന്ന് യുവതി പുഴയിലേക്ക് ചാടുന്നത് കണ്ട ലോറി ഡ്രൈവറുടെ സമയോചിതമായ ഇടപെടലാണ് രക്ഷാപ്രവർത്തനത്തിന് വഴിയൊരുക്കിയത്.

സംഭവം ശ്രദ്ധയിൽപ്പെട്ട ഉടൻ തന്നെ അതുവഴി വന്ന ലോറി ഡ്രൈവർ ബഹളം വെച്ച് സമീപത്തുണ്ടായിരുന്നവരുടെ ശ്രദ്ധ ക്ഷണിച്ചു. ബഹളം കേട്ടയുടൻ പാലത്തിന് സമീപം നിർമാണ ജോലിയിൽ ഏർപ്പെട്ടിരുന്ന ഇതര സംസ്ഥാന തൊഴിലാളി ജീവൻ പണയം വെച്ച് പുഴയിലേക്ക് എടുത്തുചാടി. യുവതിയെ രക്ഷപ്പെടുത്താനുള്ള ശ്രമത്തിനിടെ ശക്തമായ ഒഴുക്കും ക്ഷീണവും കാരണം തൊഴിലാളി അവശനാവുകയായിരുന്നു.

ഇതിനിടെ സ്ഥലത്തുണ്ടായിരുന്ന മുഴക്കുന്ന് സ്വദേശി പ്രജോദ് കയർ കെട്ടി ധൈര്യപൂർവം പുഴയിലേക്ക് ചാടി രക്ഷാപ്രവർത്തനത്തിൽ പങ്കുചേർന്നു. ഇരുവരും ചേർന്നാണ് യുവതിയെ സുരക്ഷിതമായി കരയ്ക്കടുപ്പിക്കാൻ കഴിഞ്ഞത്. തുടർന്ന് സമീപവാസികളും നാട്ടുകാരും ചേർന്ന് രക്ഷാപ്രവർത്തനത്തിന് പിന്തുണ നൽകി.

വിവരമറിഞ്ഞ് ഫയർഫോഴ്സ് സംഘവും പോലീസും സ്ഥലത്തെത്തി. രക്ഷപ്പെടുത്തിയ യുവതിയെയും രക്ഷാപ്രവർത്തനത്തിനിടെ അവശനായ ഇതര സംസ്ഥാന തൊഴിലാളിയെയും ഉടൻ തന്നെ സമീപത്തെ ആശുപത്രിയിലേക്ക് മാറ്റി. ഇരുവരുടെയും ആരോഗ്യനില സംബന്ധിച്ച കൂടുതൽ വിവരങ്ങൾ ലഭ്യമായിട്ടില്ല.

ലോറി ഡ്രൈവറുടെ ജാഗ്രതയും നിർമാണ തൊഴിലാളിയുടെയും പ്രജോദിന്റെയും സമയോചിതവും ധീരവുമായ ഇടപെടലുമാണ് വലിയൊരു ദുരന്തം ഒഴിവാക്കാൻ കാരണമായത്. സംഭവത്തെ തുടർന്ന് പ്രദേശത്ത് ഏറെ നേരം ആശങ്കയും തിരക്കുമുണ്ടായി.

### Related Links & Sources
- [Original Story Source](https://panoor.truevisionnews.com/news/367593/a-young-woman-who-jumped-into-the-river-from-the-iritty-bridge-was-rescued)