---
title: "കണ്ണീരിൽ കുതിർന്ന് പാനൂർ ; ആദിത്യ അനിൽകുമാറിന് നൊമ്പരത്തോടെ വിട"
english_title: " Aditya Anilkumar farewell with sadness"
publisher: "panoornews.in"
canonical_url: "https://panoor.truevisionnews.com/news/367021/aditya-anilkumar-farewell-with-sadness"
published_at: "2026-06-19T21:19:00+05:30"
category: "News"
language: "ml"
image: "https://cf.zdn.im/img/truevisionnews.com/0/image-uploads/6a35653cd27d5_Untitled-1_copy.jpg"
keywords: ["Aditya Anilkumar", "Death", "Panoor"]
---

# കണ്ണീരിൽ കുതിർന്ന് പാനൂർ ; ആദിത്യ അനിൽകുമാറിന് നൊമ്പരത്തോടെ വിട

> **Lead Summary:** പാനൂർ: ആത്മഹത്യയ്ക്ക് ശ്രമിച്ചതിനെ തുടർന്ന് നാല് ദിവസമായി ചികിത്സയിലിരിക്കെ മരണത്തിന് കീഴടങ്ങിയ ആദിത്യ അനിൽകുമാറിന് നാടിന്റെ കണ്ണീർ യാത്രാമൊഴി.

## Article Content

പാനൂർ: ആത്മഹത്യയ്ക്ക് ശ്രമിച്ചതിനെ തുടർന്ന് നാല് ദിവസമായി ചികിത്സയിലിരിക്കെ മരണത്തിന് കീഴടങ്ങിയ ആദിത്യ അനിൽകുമാറിന് നാടിന്റെ കണ്ണീർ യാത്രാമൊഴി.

വ്യാഴാഴ്ച വൈകിട്ട് മരണവാർത്ത പുറത്തുവന്നതോടെ പാനൂരും പരിസര പ്രദേശങ്ങളും ദുഃഖത്തിലായി. യുവപ്രായത്തിൽ ജീവിതത്തിന്റെ പാതിവഴിയിൽ യാത്ര അവസാനിപ്പിച്ച ആദിത്യയുടെ വേർപാട് കുടുംബത്തിനും സുഹൃത്തുക്കൾക്കും സഹപ്രവർത്തകർക്കും തീരാനഷ്ടമായി.

കണ്ണൂർ സർവകലാശാലയിലെ ഗസ്റ്റ് അധ്യാപികയായിരുന്ന ആദിത്യയെ കഴിഞ്ഞ ഞായറാഴ്ച രാത്രി വീട്ടിനുള്ളിൽ അവശനിലയിൽ കണ്ടെത്തുകയായിരുന്നു. ഉടൻ കണ്ണൂരിലെ സ്വകാര്യ ആശുപത്രിയിൽ പ്രവേശിപ്പിച്ചെങ്കിലും ജീവൻ രക്ഷിക്കാനായില്ല. നാല് ദിവസത്തെ ചികിത്സയ്ക്കൊടുവിൽ വ്യാഴാഴ്ച വൈകിട്ട് നാലുമണിയോടെയാണ് മരണം സംഭവിച്ചത്.

സംഭവവുമായി ബന്ധപ്പെട്ട് ആദിത്യയുടെ ആൺസുഹൃത്തായ മനേക്കര സ്വദേശി ശരണിനെ പാനൂർ പൊലീസ് അറസ്റ്റ് ചെയ്തു. ശരണിന്റെ മർദനത്തെ തുടർന്നുണ്ടായ കടുത്ത മാനസിക വിഷമമാണ് ആത്മഹത്യാ ശ്രമത്തിന് കാരണമായതെന്നാണ് ബന്ധുക്കളുടെ ആരോപണം. ശരണിനെതിരെ കൊലക്കുറ്റം ചുമത്തി കേസെടുക്കണമെന്ന ആവശ്യവും കുടുംബം ഉയർത്തിയിട്ടുണ്ട്. മകളെ ശരണാണ് മർദിച്ചതെന്ന് ആദിത്യയുടെ അമ്മ പൊലീസിന് മൊഴി നൽകിയിരുന്നു.

പരാതിയുടെ അടിസ്ഥാനത്തിൽ അന്വേഷണം ശക്തമാക്കിയ പൊലീസ് ഫോൺ കേന്ദ്രീകരിച്ച് നടത്തിയ അന്വേഷണത്തിനൊടുവിലാണ് ഒളിവിൽ കഴിയുകയായിരുന്ന ശരണിനെ കണ്ടെത്തിയത്. മനേക്കരയിലെ മറ്റൊരു വീട്ടിൽ നിന്ന് ഇയാളെ കസ്റ്റഡിയിലെടുത്ത ശേഷം അറസ്റ്റ് രേഖപ്പെടുത്തി.

പരിയാരത്ത് പോസ്റ്റ്മോർട്ടം നടപടികൾ പൂർത്തിയാക്കിയ ശേഷം മൃതദേഹം വീട്ടിലെത്തിച്ചപ്പോൾ നൊമ്പരക്കാഴ്ചകൾക്ക് സാക്ഷിയായി പ്രദേശം. അവസാനമായി ഒരു നോക്ക് കാണാൻ ബന്ധുക്കളും സുഹൃത്തുക്കളും സഹപാഠികളും നാട്ടുകാരും വീട്ടിലേക്ക് ഒഴുകിയെത്തി. കണ്ണീരോടെ പൂക്കൾ അർപ്പിച്ചും പ്രാർത്ഥനകളോടെ യാത്രാമൊഴി നേർന്നുമാണ് പ്രിയപ്പെട്ടവരെല്ലാം ആദിത്യയെ അവസാനമായി കണ്ടത്.

വിദ്യാർത്ഥികളോടും സഹപ്രവർത്തകരോടും സൗഹൃദപരമായി ഇടപെട്ടിരുന്ന ആദിത്യയുടെ അപ്രതീക്ഷിത വിയോഗം വിദ്യാഭ്യാസ മേഖലയിലും വലിയ ദുഃഖമാണ് സൃഷ്ടിച്ചത്. നിറഞ്ഞ സ്വപ്നങ്ങളുമായും പ്രതീക്ഷകളുമായും മുന്നോട്ടുപോകേണ്ടിയിരുന്ന ഒരു യുവജീവിതം അകാലത്തിൽ പൊലിഞ്ഞതിന്റെ വേദനയിലാണ് കുടുംബവും നാടും.

വൈകിട്ട് അഞ്ചുമണിയോടെ വീട്ടുവളപ്പിൽ നടന്ന സംസ്കാര ചടങ്ങിൽ നൂറുകണക്കിന് ആളുകൾ പങ്കെടുത്തു. ഓരോ മുഖത്തും ദുഃഖത്തിന്റെ നിഴലും ഓരോ കണ്ണുകളിലും കണ്ണീരും നിറഞ്ഞുനിന്നപ്പോൾ, ആദിത്യയുടെ യാത്രാമൊഴി പാനൂരിന് മറക്കാനാവാത്ത നൊമ്പര നിമിഷമായി മാറി.

### Related Links & Sources
- [Original Story Source](https://panoor.truevisionnews.com/news/367021/aditya-anilkumar-farewell-with-sadness)