---
title: "പാനൂരിൽ ബൈക്ക് യാത്രക്കാരനെ ഓടിക്കടിച്ച്  തെരുവുനായ ; യുവാവ് ആശുപത്രിയിൽ"
english_title: "A stray dog bitten over a biker in Panur; the young man is hospitalized"
publisher: "panoornews.in"
canonical_url: "https://panoor.truevisionnews.com/news/365861/a-stray-dog-bitten-over-a-biker-in-panur-the-young-man-is-hospitalized"
published_at: "2026-06-14T09:17:00+05:30"
category: "News"
language: "ml"
image: "https://cf.zdn.im/img/truevisionnews.com/0/image-uploads/6a2e24cb9d6ff_Untitled-1_copy.jpg"
keywords: ["Stray dog", "Bitten", "Panoor"]
---

# പാനൂരിൽ ബൈക്ക് യാത്രക്കാരനെ ഓടിക്കടിച്ച്  തെരുവുനായ ; യുവാവ് ആശുപത്രിയിൽ

> **Lead Summary:** പാനൂർ: പാനൂർ ടൗണിൽ വീണ്ടും തെരുവുനായ ആക്രമണം. ബൈക്കിൽ യാത്ര ചെയ്യുകയായിരുന്ന യുവാവിന് തെരുവുനായയുടെ കടിയേറ്റ് പരിക്കേറ്റ സംഭവമാണ് പ്രദേശത്ത് ആശങ്ക ഉയർത്തിയിരിക്കുന്നത്. പാനൂർ ബസ് സ്റ്റാൻഡ് ജംഗ്ഷനിലെ ക്ലാസിക് ബേക്കറിക്ക് സമീപം ഇന്നലെ രാത്രി 9 മണിയോടെയായിരുന്നു സംഭവം.

## Article Content

പാനൂർ: പാനൂർ ടൗണിൽ വീണ്ടും തെരുവുനായ ആക്രമണം. ബൈക്കിൽ യാത്ര ചെയ്യുകയായിരുന്ന യുവാവിന് തെരുവുനായയുടെ കടിയേറ്റ് പരിക്കേറ്റ സംഭവമാണ് പ്രദേശത്ത് ആശങ്ക ഉയർത്തിയിരിക്കുന്നത്. പാനൂർ ബസ് സ്റ്റാൻഡ് ജംഗ്ഷനിലെ ക്ലാസിക് ബേക്കറിക്ക് സമീപം ഇന്നലെ രാത്രി 9 മണിയോടെയായിരുന്നു സംഭവം.

പാനൂർ സ്വദേശിയായ കൊട്ടാരത്തിൽ സന്തോഷ് (48) ആണ് ആക്രമണത്തിനിരയായത്. പാനൂർ ബസ് സ്റ്റാൻഡിലേക്ക് ബൈക്കിൽ പോകുന്നതിനിടെയാണ് തെരുവുനായ പെട്ടെന്ന് ആക്രമിച്ചത്. ആക്രമണത്തിൽ സന്തോഷിന്റെ കാലിന് കടിയേൽക്കുകയായിരുന്നു. സംഭവം കണ്ട സമീപവാസികളും യാത്രക്കാരും ഉടൻ സ്ഥലത്തെത്തി സഹായം നൽകി.

പരിക്കേറ്റ സന്തോഷിനെ നാട്ടുകാർ ചേർന്ന് ഉടൻ തലശ്ശേരി ഗവൺമെന്റ് ജനറൽ ആശുപത്രിയിൽ എത്തിച്ച് ചികിത്സയ്ക്ക് പ്രവേശിപ്പിച്ചു. പരിക്ക് ഗുരുതരമല്ലെന്നും ആവശ്യമായ ചികിത്സയും പ്രതിരോധ കുത്തിവയ്പ്പുകളും നൽകിയിട്ടുണ്ടെന്നും ആശുപത്രി അധികൃതർ അറിയിച്ചു.

സംഭവത്തെ തുടർന്ന് പ്രദേശവാസികൾ തെരുവുനായ ശല്യത്തിനെതിരെ ശക്തമായ പ്രതിഷേധവുമായി രംഗത്തെത്തി. പാനൂർ ടൗണിലേക്കുള്ള പ്രധാന പ്രവേശന കേന്ദ്രങ്ങളിലൊന്നായ ബസ് സ്റ്റാൻഡ് ജംഗ്ഷനിലും പരിസര പ്രദേശങ്ങളിലുമായി തെരുവുനായകളുടെ എണ്ണം വർധിച്ചിട്ടുണ്ടെന്നാണ് നാട്ടുകാർ പറയുന്നത്. രാത്രികാലങ്ങളിൽ യാത്രക്കാർക്കും കാൽനടയാത്രക്കാർക്കും വിദ്യാർത്ഥികൾക്കും വലിയ ഭീഷണിയാണ് തെരുവുനായകളെന്ന് അവർ ചൂണ്ടിക്കാട്ടുന്നു.

സമീപകാലത്തായി പാനൂർ മേഖലയിലെ വിവിധ ഭാഗങ്ങളിൽ തെരുവുനായ ആക്രമണങ്ങൾ റിപ്പോർട്ട് ചെയ്തിട്ടുണ്ടെന്നും പ്രശ്നത്തിന് ശാശ്വത പരിഹാരം കാണാൻ ബന്ധപ്പെട്ട വകുപ്പുകളും തദ്ദേശ സ്വയംഭരണ സ്ഥാപനങ്ങളും അടിയന്തരമായി ഇടപെടണമെന്നും നാട്ടുകാർ ആവശ്യപ്പെട്ടു. തെരുവുനായകളെ നിയന്ത്രിക്കുന്നതിനും പൊതുജനങ്ങളുടെ സുരക്ഷ ഉറപ്പാക്കുന്നതിനുമായി ഫലപ്രദമായ നടപടികൾ സ്വീകരിക്കണമെന്ന ആവശ്യം ശക്തമാകുകയാണ്.

### Related Links & Sources
- [Original Story Source](https://panoor.truevisionnews.com/news/365861/a-stray-dog-bitten-over-a-biker-in-panur-the-young-man-is-hospitalized)