---
title: "സിഎംആർഎൽ മാസപ്പടി കേസിൽ വീണ ടി.യ്ക്ക് വീണ്ടും ഇഡി സമൻസ് ; ബുധനാഴ്ച ഹാജരാകാൻ നിർദേശം"
english_title: "Veena T. summoned again by ED in CMRL monthly payment case; directed to appear on Wednesday"
publisher: "panoornews.in"
canonical_url: "https://panoor.truevisionnews.com/news/365488/veena-t-summoned-again-by-ed-in-cmrl-monthly-payment-case-directed-to-appear-on-wednesday"
published_at: "2026-06-12T12:02:00+05:30"
category: "News"
language: "ml"
image: "https://cf.zdn.im/img/truevisionnews.com/0/image-uploads/6a2ba89bb67d2_Untitled-1_copy.jpg"
keywords: ["Veena T", "Summonce", "CMRL", "Masapadi case", "Wednesday"]
---

# സിഎംആർഎൽ മാസപ്പടി കേസിൽ വീണ ടി.യ്ക്ക് വീണ്ടും ഇഡി സമൻസ് ; ബുധനാഴ്ച ഹാജരാകാൻ നിർദേശം

> **Lead Summary:** സിഎംആർഎൽ–എക്സാലോജിക് സാമ്പത്തിക ഇടപാട് കേസിൽ മുൻ മുഖ്യമന്ത്രി പിണറായി വിജയന്റെ മകളും എക്സാലോജിക് സൊല്യൂഷൻസ് ഉടമയുമായ വീണ ടി.യ്ക്ക് എൻഫോഴ്‌സ്‌മെന്റ് ഡയറക്ടറേറ്റ് (ഇഡി) വീണ്ടും സമൻസ് അയച്ചു. ആരോഗ്യപ്രശ്നങ്ങൾ ചൂണ്ടിക്കാട്ടി നേരത്തെ നിശ്ചയിച്ചിരുന്ന ദിവസമായ ഇന്ന് ഹാജരാകാൻ കഴിയില്ലെന്ന് വീണ ഇഡിയെ അറിയിച്ചതിന് പിന്നാലെയാണ് പുതിയ സമൻസ് പുറപ്പെടുവിച്ചത്. അടുത്ത ബുധനാഴ്ച ചോദ്യം ചെയ്യലിനായി ഹാജരാകണമെന്നാണ് ഇഡി നിർദേശിച്ചിരിക്കുന്നത്.

## Article Content

സിഎംആർഎൽ–എക്സാലോജിക് സാമ്പത്തിക ഇടപാട് കേസിൽ മുൻ മുഖ്യമന്ത്രി പിണറായി വിജയന്റെ മകളും എക്സാലോജിക് സൊല്യൂഷൻസ് ഉടമയുമായ വീണ ടി.യ്ക്ക് എൻഫോഴ്‌സ്‌മെന്റ് ഡയറക്ടറേറ്റ് (ഇഡി) വീണ്ടും സമൻസ് അയച്ചു. ആരോഗ്യപ്രശ്നങ്ങൾ ചൂണ്ടിക്കാട്ടി നേരത്തെ നിശ്ചയിച്ചിരുന്ന ദിവസമായ ഇന്ന് ഹാജരാകാൻ കഴിയില്ലെന്ന് വീണ ഇഡിയെ അറിയിച്ചതിന് പിന്നാലെയാണ് പുതിയ സമൻസ് പുറപ്പെടുവിച്ചത്. അടുത്ത ബുധനാഴ്ച ചോദ്യം ചെയ്യലിനായി ഹാജരാകണമെന്നാണ് ഇഡി നിർദേശിച്ചിരിക്കുന്നത്.

നേരത്തെ ഇഡി ആവശ്യപ്പെട്ട രേഖകൾ തന്റെ അഭിഭാഷകർ മുഖേന കൈമാറാമെന്ന് വീണ ഇ-മെയിൽ വഴി അന്വേഷണ സംഘത്തെ അറിയിച്ചിരുന്നു. എന്നാൽ, ഇതുസംബന്ധിച്ച് ഇഡിയുടെ ഭാഗത്തുനിന്ന് ഔദ്യോഗിക മറുപടി ലഭിച്ചിട്ടില്ലെന്നാണ് വിവരം. അതേസമയം, സിഎംആർഎല്ലിൽ നിന്ന് ലഭിച്ച പണത്തിന്റെ സ്വഭാവവും അതിന് പിന്നിലെ സാമ്പത്തിക ഇടപാടുകളും വിശദീകരിക്കുന്ന രേഖകളുമായി നേരിട്ട് ഹാജരാകണമെന്നാണ് ഇഡി നൽകിയിരിക്കുന്ന നിർദേശം.

കരിമണൽ ഖനന മേഖലയിലെ പ്രമുഖ സ്ഥാപനമായ സി.എം.ആർ.എല്ലും എക്സാലോജിക് സൊല്യൂഷൻസും തമ്മിൽ നടന്നതായി പറയപ്പെടുന്ന സാമ്പത്തിക ഇടപാടുകളുമായി ബന്ധപ്പെട്ടാണ് അന്വേഷണം പുരോഗമിക്കുന്നത്. യഥാർഥ സേവനങ്ങളൊന്നും ലഭിക്കാതെ പണം കൈമാറിയെന്ന ആരോപണവും കമ്പനിയുടെ അക്കൗണ്ടുകളിൽ ഇല്ലാത്ത ചെലവുകൾ കാണിച്ച് 132 കോടിയിലധികം രൂപയുടെ ക്രമക്കേട് നടന്നെന്ന ഗുരുതര കണ്ടെത്തലുമാണ് കേസിന് അടിസ്ഥാനമായത്. ഗൗരവമായ ഈ ആരോപണങ്ങൾ ആദ്യം ചൂണ്ടിക്കാട്ടിയത് സീരിയസ് ഫ്രോഡ് ഇൻവെസ്റ്റിഗേഷൻ ഓഫീസിന്റെ (എസ്എഫ്ഐഒ) അന്വേഷണ റിപ്പോർട്ടിലൂടെയായിരുന്നു.

എസ്എഫ്ഐഒയുടെ കണ്ടെത്തലുകളെ തുടർന്നാണ് കള്ളപ്പണ ഇടപാട് നിരോധന നിയമപ്രകാരം ഇഡി അന്വേഷണം ആരംഭിച്ചത്. 2016 മുതൽ 2021 വരെയുള്ള കാലയളവിൽ സിഎംആർഎല്ലിൽ നിന്ന് വീണയ്ക്ക് 2.78 കോടി രൂപ ലഭിച്ചതായും എംപവർ ഇന്ത്യ ക്യാപിറ്റലിൽ നിന്ന് 50 ലക്ഷം രൂപ വായ്പയായി ലഭിച്ചതായും അന്വേഷണ രേഖകളിൽ പരാമർശമുണ്ട്. ഈ സാമ്പത്തിക ഇടപാടുകളുടെ നിയമസാധുതയും പണത്തിന്റെ ഉപയോഗവും സംബന്ധിച്ച വിശദീകരണങ്ങളാണ് ഇഡി പ്രധാനമായും തേടുന്നത്.

ഇതിനിടെ, സി.എം.ആർ.എൽ മാനേജിങ് ഡയറക്ടർ ശശിധരൻ കർത്തയുടെ മകൻ ശരൺ എസ്. കർത്ത ഉൾപ്പെടെ എട്ടുപേരെ തിങ്കളാഴ്ച ചോദ്യം ചെയ്യാനും ഇഡി തീരുമാനിച്ചിട്ടുണ്ട്. ഇവരുടെ മൊഴികളും രേഖകളും കേസിന്റെ തുടർ അന്വേഷണത്തിൽ നിർണായകമാകുമെന്നാണ് വിലയിരുത്തൽ.

സംസ്ഥാന രാഷ്ട്രീയത്തിൽ ഏറെ ചർച്ചയായ 'മാസപ്പടി കേസ്' പുതിയ വഴിത്തിരിവിലേക്ക് കടക്കുമ്പോൾ, ഇഡിയുടെ തുടർനടപടികളും വീണ ടി. ബുധനാഴ്ച ഹാജരാകുമോയെന്ന കാര്യവും ശ്രദ്ധേയമായിരിക്കുകയാണ്. കേസിന്റെ അന്വേഷണ പുരോഗതി കേരള രാഷ്ട്രീയത്തിലും ദേശീയ തലത്തിലും വലിയ പ്രതിഫലനങ്ങൾ സൃഷ്ടിക്കുമെന്ന വിലയിരുത്തലും ശക്തമാണ്.

### Related Links & Sources
- [Original Story Source](https://panoor.truevisionnews.com/news/365488/veena-t-summoned-again-by-ed-in-cmrl-monthly-payment-case-directed-to-appear-on-wednesday)