---
title: "മൃഗശാലയിൽ മൃഗങ്ങളെ പരിശോധിക്കുന്നതിനിടെ ഹിപ്പോയുടെ അക്രമത്തിൽ 27കാരിയായ വെറ്ററിനറി ഡോക്ടർക്ക് ദാരുണാന്ത്യം"
english_title: "A 27-year-old veterinarian died tragically after being attacked by a hippo while examining animals at a zoo."
publisher: "panoornews.in"
canonical_url: "https://panoor.truevisionnews.com/news/348834/a-27-year-old-veterinarian-died-tragically-after-being-attacked-by-a-hippo-while-examining-animals-at-a-zoo"
published_at: "2026-03-20T20:34:00+05:30"
category: "News"
language: "ml"
image: "https://cf.zdn.im/img/truevisionnews.com/0/image-uploads/69bd623f85ebb_463b6203-18f5-4080-b9f0-0e7ee7cfb04a.jfif"
keywords: []
---

# മൃഗശാലയിൽ മൃഗങ്ങളെ പരിശോധിക്കുന്നതിനിടെ ഹിപ്പോയുടെ അക്രമത്തിൽ 27കാരിയായ വെറ്ററിനറി ഡോക്ടർക്ക് ദാരുണാന്ത്യം

> **Lead Summary:** മൃഗശാലയിൽ പതിവ് പരിശോധന നടത്തുന്നതിനിടയിൽ ഹിപ്പോപ്പൊട്ടാമസിന്റെ ആക്രമണത്തിൽ വെറ്ററിനറി ഡോക്ടറിന് ദാരുണാന്ത്യം. കർണാടകയിലെ ശിവമോഗ ജില്ലയിലാണ് സംഭവം. 27കാരിയായി ഡോ. സമീക്ഷ റെഡ്ഡിയാണ് മരിച്ചത്. ബെംഗളുരു സ്വദേശിനിയാണ്. തവരേകോപ്പാ ലയൺ ആൻഡ് സഫാരി മൃഗശാലയിൽ കരാർ അടിസ്ഥാനത്തിൽ നിയമിതയായ ഡോക്ടറാണ് സമീക്ഷ.

## Article Content

മൃഗശാലയിൽ പതിവ് പരിശോധന നടത്തുന്നതിനിടയിൽ ഹിപ്പോപ്പൊട്ടാമസിന്റെ ആക്രമണത്തിൽ വെറ്ററിനറി ഡോക്ടറിന് ദാരുണാന്ത്യം. കർണാടകയിലെ ശിവമോഗ ജില്ലയിലാണ് സംഭവം. 27കാരിയായി ഡോ. സമീക്ഷ റെഡ്ഡിയാണ് മരിച്ചത്. ബെംഗളുരു സ്വദേശിനിയാണ്. തവരേകോപ്പാ ലയൺ ആൻഡ് സഫാരി മൃഗശാലയിൽ കരാർ അടിസ്ഥാനത്തിൽ നിയമിതയായ ഡോക്ടറാണ് സമീക്ഷ.

വ്യാഴാഴ്ച്‌ച രാത്രി 10.30ന് ഒരു സൺ കൊനൂർ പക്ഷിയെ പരിശോധിച്ച ശേഷം 11.45ഓടെ ഗർഭിണിയായ ഒരു ഹിപ്പോപ്പൊട്ടാമസിനെ പരിശോധിക്കാൻ പോയതാണ് ഡോക്ടർ. തെർമൽ ക്യാമറ ഉപയോഗിച്ച് പരിശോധന നടത്തുന്നതിനിടയിലാണ് ഹിപ്പോ ഇവരെ ആക്രമിച്ചത്.

പരിക്കേറ്റ ഡോക്ടറെ ഉടൻ തന്നെ ആശുപത്രിയിലെത്തിക്കുകയും ശസ്ത്രക്രിയയ്ക്ക് വിധേയയാക്കുകയും ചെയ്തു‌. ചികിത്സയിലിരിക്കെ വെള്ളിയാഴ്ച‌യാണ് ഡോക്ടർ മരിച്ചത്. ദൗർഭാഗ്യകരമായ സംഭവമെന്നാണ് കർണാടക വനമന്ത്രി ഈശ്വർ ഖാൻട്രേ പ്രതികരിച്ചത്. സമീക്ഷയുടെ കുടുംബത്തിൻ്റെ ദുഃഖത്തിൽ പങ്കുചേരുന്നുവെന്നും അദ്ദേഹം പറഞ്ഞു. ഡോക്ടറുടെ കുടുംബത്തിന് നഷ്ടപരിഹാരവും സർക്കാർ പ്രഖ്യാപിച്ചിട്ടുണ്ട്.

സംസ്ഥാനത്തെ എല്ലാ മൃഗശാലകളിലെയും വെറ്ററിനിറി ഡോക്ടർമാരും മൃഗങ്ങളെ പരിശോധിക്കുമ്പോൾ കർശനമായി സ്റ്റാൻ്റേർഡ് ഓപ്പറേറ്റിങ് പ്രൊസീജ്യർ പാലിക്കണമെന്നും മന്ത്രി ആവശ്യപ്പെട്ടു. കൂടാതെ സമീക്ഷയുടെ മരണത്തിൽ സീനിയർ വെറ്ററിനറി ഡോക്ടർമാരുടെ സംഘത്തോട് ഏഴ് ദിവസത്തിനുള്ളിൽ അന്വേഷണ റിപ്പോർട്ട് സമർപ്പിക്കാൻ നിർദേശിച്ചിട്ടുണ്ടെന്നും ഈശ്വർ ഖാൻദ്രേ വ്യക്തമാക്കി.

### Related Links & Sources
- [Original Story Source](https://panoor.truevisionnews.com/news/348834/a-27-year-old-veterinarian-died-tragically-after-being-attacked-by-a-hippo-while-examining-animals-at-a-zoo)