---
title: "ഡ്രൈവിംഗ് കുട്ടിക്കളിയല്ല ; 18 തികയാത്ത ഡ്രൈവർമാർക്ക് ഇനി ജുവനൈൽ ഹോം, വാഹനം നൽകുന്നവർക്ക് 6 മാസം തടവ്, 25,000 പിഴ."
english_title: "Driving is not child's play; Juvenile home for drivers under 18, 6 months in prison and 25,000 fine for those who provide vehicles."
publisher: "panoornews.in"
canonical_url: "https://panoor.truevisionnews.com/news/343270/driving-is-not-childs-play-juvenile-home-for-drivers-under-18-6-months-in-prison-and-25000-fine-for-those-who-provide-vehicles"
published_at: "2026-02-21T10:43:00+05:30"
category: "News"
language: "ml"
image: "https://cf.zdn.im/img/truevisionnews.com/0/image-uploads/69993f995d3e1_Untitled-2_copy.jpg"
keywords: []
---

# ഡ്രൈവിംഗ് കുട്ടിക്കളിയല്ല ; 18 തികയാത്ത ഡ്രൈവർമാർക്ക് ഇനി ജുവനൈൽ ഹോം, വാഹനം നൽകുന്നവർക്ക് 6 മാസം തടവ്, 25,000 പിഴ.

> **Lead Summary:** 18 വയസാകും മുമ്പേ മോട്ടോർ വാഹനങ്ങളിൽ വിലസുന്ന വരെ പൊലീസും എം.വി.ഡി ഉദ്യോഗസ്ഥരും ഇനി വളഞ്ഞിട്ട് പിടിക്കും. പിടിക്കപ്പെടുന്നവർ ഇനി ജുവനൈൽ ഹോമിൽ കിടക്കേണ്ടിയും വരും.!. കുട്ടികൾക്ക് വണ്ടി കൊടുക്കുന്ന മുതിർന്നവർക്ക് ഇനി പഴയതുപോലെ പിഴ കൊടുത്ത് ഊരിപ്പോകാനും പറ്റില്ല. ആറുമാസം വരെ നിങ്ങളും അകത്താകും.

## Article Content

18 വയസാകും മുമ്പേ മോട്ടോർ വാഹനങ്ങളിൽ വിലസുന്ന വരെ പൊലീസും എം.വി.ഡി ഉദ്യോഗസ്ഥരും ഇനി വളഞ്ഞിട്ട് പിടിക്കും. പിടിക്കപ്പെടുന്നവർ ഇനി ജുവനൈൽ ഹോമിൽ കിടക്കേണ്ടിയും വരും.!. കുട്ടികൾക്ക് വണ്ടി കൊടുക്കുന്ന മുതിർന്നവർക്ക് ഇനി പഴയതുപോലെ പിഴ കൊടുത്ത് ഊരിപ്പോകാനും പറ്റില്ല. ആറുമാസം വരെ നിങ്ങളും അകത്താകും.

തിരുവനന്തപുരം നഗരത്തിൽ കഴിഞ്ഞ ദിവസം തുടങ്ങിയ പ്രത്യേക പരിശോധനയിൽ 18 തികയാത്ത 9 പേരെ പൊലീസ് പിടികൂടി. ഇവർക്ക് വാഹനം നൽകിയ മുതിർന്നവരെ പ്രതികളാക്കാനുള്ള നടപടികളുമായി പൊലീസ് മുന്നോട്ടു പോവുകയാണ്. മറ്റ് ജില്ലകളിലേക്കും പരിശോധന വ്യാപിപ്പിക്കും.

പ്രായപൂർത്തിയാകാത്തവർ വാഹനമോടിക്കുന്നത് തടയാൻ 2019ലാണ് കേന്ദ്ര മോട്ടോർ നിയമം പരിഷ്കരിച്ച് തടവു ശിക്ഷ കൂടി ഉൾപ്പെടുത്തിയത്. എന്നാൽ കേരളത്തിലുൾപ്പെടെ നിയമം കർശനമായി നടപ്പിലാക്കിയിരുന്നില്ല. പ്രായപൂർത്തിയാകാത്തവർ ഓടിക്കുന്ന വാഹനങ്ങൾ അപകടമുണ്ടാക്കുന്നത് പതിവായതോടെയാണ് കർശനമായി നടപ്പാക്കാൻ തീരുമാനിച്ചത്.

25,000 രൂപ പിഴ, 6 മാസം തടവ്

1. കുട്ടികൾ വാഹനമോടിച്ചാൽ ആർ.സി ഉടമയോ, വാഹനം കൈവശം വച്ചിരിക്കുന്നയാളോ മുഖ്യപ്രതിയാകും. 25,000 രൂപ പിഴയും ആറു മാസം വരെ തടവുമാണ് ശിക്ഷ. ആർ.സി സസ്പെൻഡ് ചെയ്യും.

2. പ്രായപൂർത്തിയാകാത്ത വ്യക്തിയെ ജുവനൈൽ കോടതിയിൽ ഹാജരാക്കും. കുറ്റത്തിന്റെ സ്വഭാവമനുസരിച്ച് ജുവനൈൽ ഹോമിൽ പാർപ്പിക്കാം. 25 വയസുവരെ ഡ്രൈവിംഗ് ടെസ്റ്റിന് പങ്കെടുക്കാനാകില്ല.

3. ബൈക്കിൽ കുറ്റവാളികളായ കുട്ടികൾ വിലസുന്നത് കൂടുതലും മോഷ്ടിച്ചെടുത്ത വാഹനങ്ങളിലാണെന്ന് പൊലീസ്. ലഹരിക്കടത്ത് സംഘത്തിന്റെ വലയിൽപ്പെട്ട കുട്ടികളും മാലമോഷണ സംഘത്തിൽപ്പെട്ട കുട്ടികളും മോഷ്ടിച്ചെടുത്ത വാഹനങ്ങളാണ് ഉപയോഗിക്കുന്നത്. ബൈക്ക് ഓടിക്കുന്ന 18 കഴിയാത്തവർ നിരത്തുകളിൽ സ്പീ‌‌ഡ്റേസിംഗ് നടത്തുന്നു. റേസിംഗ് നടത്തുന്നവരിൽ പലരും മയക്കുമരുന്ന് ഉപയോഗിക്കുന്നതായി പൊലീസിന് വിവരം ലഭിച്ചിട്ടുണ്ട്.

### Related Links & Sources
- [Original Story Source](https://panoor.truevisionnews.com/news/343270/driving-is-not-childs-play-juvenile-home-for-drivers-under-18-6-months-in-prison-and-25000-fine-for-those-who-provide-vehicles)