---
title: "കോഴിക്കോട് പയ്യോളിയിൽ കടലിൽ കുളിക്കാനിറങ്ങിയ നാല് വിനോദസഞ്ചാരികൾ തിരയിൽപ്പെട്ട് മരിച്ചു, ഒരാളുടെ നിലഗുരുതരം"
english_title: "Four tourists who went for a swim in the sea at Payyoli, Kozhikode died after being swept away by the waves, one in critical condition"
publisher: "panoornews.in"
canonical_url: "https://panoor.truevisionnews.com/news/266014/four-tourists-who-went-for-a-swim-in-the-sea-at-payyoli-kozhikode-died-after-being-swept-away-by-the-waves-one-in-critical-condition"
published_at: "2025-01-26T18:23:00+05:30"
category: "News"
language: "ml"
image: "https://cf.zdn.im/img/truevisionnews.com/0/image-uploads/6796304ad440e_67962e100fd46_thikkodi.jpg"
keywords: []
---

# കോഴിക്കോട് പയ്യോളിയിൽ കടലിൽ കുളിക്കാനിറങ്ങിയ നാല് വിനോദസഞ്ചാരികൾ തിരയിൽപ്പെട്ട് മരിച്ചു, ഒരാളുടെ നിലഗുരുതരം

> **Lead Summary:** കോഴിക്കോട് പയ്യോളി തിക്കോടിയിൽ കടലിൽ കുളിക്കാനിറങ്ങിയ സ്ത്രീകളടക്കം നാലു പേര്‍ക്ക് ദാരുണാന്ത്യം. വയനാട് കല്‍പ്പറ്റ സ്വദേശികളാണ് അപകടത്തിൽപ്പെട്ടത്. ഇന്ന് വൈകിട്ടോടെ പയ്യോളി തിക്കോടി കല്ലകത്ത് ബീച്ചിലാണ് സംഭവം.

## Article Content

കോഴിക്കോട് പയ്യോളി തിക്കോടിയിൽ കടലിൽ കുളിക്കാനിറങ്ങിയ സ്ത്രീകളടക്കം നാലു പേര്‍ക്ക് ദാരുണാന്ത്യം. വയനാട് കല്‍പ്പറ്റ സ്വദേശികളാണ് അപകടത്തിൽപ്പെട്ടത്. ഇന്ന് വൈകിട്ടോടെ പയ്യോളി തിക്കോടി കല്ലകത്ത് ബീച്ചിലാണ് സംഭവം.

കല്‍പ്പറ്റയിലെ ജിമ്മിൽ ഒരുമിച്ച് പരിശീലനം നടത്തുന്നവരാണ് അപകടത്തിൽപ്പെട്ടത്.

തിരയിൽപെട്ട ഒരാളെ കൊയിലാണ്ടി താലൂക്ക് ആശുപത്രിയിൽ പ്രവേശിപ്പിച്ചിട്ടുണ്ട്. ഇയാളുടെ നില ഗുരുതരമാണെന്നാണ് ലഭിക്കുന്ന വിവരം. ഇന്ന് വൈകുന്നേരം നാല് മണിയോടെയാണ് അപകടം.

അവധി ദിവസമായ ഞായറാഴ്ച ഇവര്‍ പയ്യോളിയിലെത്തിയതായിരുന്നുവെന്നാണ് വിവരം. ജിമ്മിലെ വനിത ട്രെയിൻ ഉള്‍പ്പെടെയുള്ള സംഘമാണ് അപകടത്തിൽപ്പെട്ടത്.

മുണ്ടേരി സ്വദേശി ഫൈസൽ, കല്‍പ്പറ്റ നോര്‍ത്ത് സിപിഎം ലോക്കൽ കമ്മിറ്റി അംഗം ബിനീഷ്, അനീസ, വാണി എന്നിവരാണ് മരിച്ചത്. ജിൻസി എന്ന യുവതിയെ കൊയിലാണ്ടി താലൂക്ക് ആശുപത്രിയിൽ പ്രവേശിപ്പിച്ചു. അ‍ഞ്ചുപേരും തിരയിൽപെടുകയായിരുന്നു.

ഇവരെ ഉടൻ തന്നെ പുറത്തെടുത്ത് ആശുപത്രിയിലേക്ക് കൊണ്ടുപോയെങ്കിലും നാലുപേരെ രക്ഷിക്കാനായില്ല. കല്‍പറ്റയിലെ ജിമ്മിൽ പരിശീലനം നടത്തുന്നവരും ട്രെയിനേഴ്സും അടക്കം 26 അംഗം സംഘമാണ് ടെംപോ ട്രാവലറിൽ തിക്കോടി കല്ലകത്ത് ബീച്ചിലെത്തിയത്. അവധിയായതിനാൽ ബീച്ചിൽ നല്ല തിരക്കുണ്ടായിരുന്നു.

ബീച്ചിലുണ്ടായിരുന്നവർ ഉടൻ തന്നെ കൊയിലാണ്ടി അഗ്നിരക്ഷാസേനയെയും കൊയിലാണ്ടി പോലീസിനെയും വിവരം അറിയിച്ചു.

തുടർന്ന് നടത്തിയ രക്ഷാപ്രവർത്തനത്തിൽ ഒരാളെ കണ്ടെത്തി. ഇയാൾ പറഞ്ഞതിൻ്റെ അടിസ്ഥാനത്തിൽ നടത്തിയ തിരച്ചിലിലാണ് ബാക്കി നാല് പേരെയും കണ്ടെത്തിയത്.

### Related Links & Sources
- [Original Story Source](https://panoor.truevisionnews.com/news/266014/four-tourists-who-went-for-a-swim-in-the-sea-at-payyoli-kozhikode-died-after-being-swept-away-by-the-waves-one-in-critical-condition)