---
title: "വയനാട്ടിൽ നിന്നും  കാണാതായ വീട്ടമ്മ കണ്ണൂരിലെ വനത്തിൽ മരിച്ച നിലയിൽ ; വീട്ടിൽ നിന്നിറങ്ങിയത് മരുന്ന് വാങ്ങാനായി"
english_title: "Housewife missing from Wayanad found dead in Kannur forest;He left home to buy medicine"
publisher: "panoornews.in"
canonical_url: "https://panoor.truevisionnews.com/news/103306/housewife-missing-from-wayanad-found-dead-in-kannur-foresthe-left-home-to-buy-medicine"
published_at: "2023-03-16T09:46:00+05:30"
category: "News"
language: "ml"
image: "https://cf.zdn.im/img/truevisionnews.com/0/image-uploads/64129842d0a9c_download.jpg"
keywords: []
---

# വയനാട്ടിൽ നിന്നും  കാണാതായ വീട്ടമ്മ കണ്ണൂരിലെ വനത്തിൽ മരിച്ച നിലയിൽ ; വീട്ടിൽ നിന്നിറങ്ങിയത് മരുന്ന് വാങ്ങാനായി

> **Lead Summary:** തലപ്പുഴ വെണ്മണി ചുള്ളിയിൽ നിന്ന് കഴിഞ്ഞ ദിവസം കാണാതായ വീട്ടമ്മയെ കണ്ണൂരിൽ മരിച്ച നിലയിൽ കണ്ടെത്തി. ചുള്ളി ഇരട്ട പീടികയിൽ ലീലാമ്മ യെയാണ് കണ്ണൂർ കോളയാട് ചങ്ങലഗേറ്റിനു സമീപത്തുള്ള പന്നിയോട് വനത്തിനുള്ളിൽ മരിച്ച നിലയിൽ കണ്ടെത്തിയത്. ബുധനാഴ്ച വൈകീട്ടാണ് ലീലാമ്മയുടെ മൃതദേഹം കണ്ടെത്തിയത്.

## Article Content

തലപ്പുഴ വെണ്മണി ചുള്ളിയിൽ നിന്ന് കഴിഞ്ഞ ദിവസം കാണാതായ വീട്ടമ്മയെ കണ്ണൂരിൽ മരിച്ച നിലയിൽ കണ്ടെത്തി. ചുള്ളി ഇരട്ട പീടികയിൽ ലീലാമ്മ യെയാണ് കണ്ണൂർ കോളയാട് ചങ്ങലഗേറ്റിനു സമീപത്തുള്ള പന്നിയോട് വനത്തിനുള്ളിൽ മരിച്ച നിലയിൽ കണ്ടെത്തിയത്. ബുധനാഴ്ച വൈകീട്ടാണ് ലീലാമ്മയുടെ മൃതദേഹം കണ്ടെത്തിയത്.

വനവകുപ്പ് ജീവനക്കാരും പോലീസും നാട്ടുകാരും ചേർന്ന് നടത്തിയ തിരച്ചിലിലാണ് മൃതദേഹം കണ്ടെത്തിയത്. ബന്ധുക്കൾ സ്ഥലത്തെത്തി മരിച്ചത് ലീലമ്മ തന്നെയാണെന്ന് സ്ഥിരീകരിച്ചിട്ടുണ്ട്. ഈ മാസം നാലിനാണ് വീട്ടമ്മയെ കാണാതായത്. മരുന്ന് വാങ്ങണമെന്ന് മക്കളെ അറിയിച്ചതിന് ശേഷം വീട്ടിൽ നിന്ന് ഇറങ്ങിയതായിരുന്നു. പതിവുപോലെ തിരിച്ചെത്തേണ്ട സമയം കഴിഞ്ഞിട്ടും കാണാത്തതിനെ തുടർന്ന് മകനും മറ്റു ബന്ധുക്കളും ചേർന്ന് തലപ്പുഴ പോലീസിൽ പരാതി നൽകുകയായിരുന്നു. കാണാതായ ദിവസം വൈകീട്ടായിരുന്നു ബന്ധുക്കൾ പരാതി നൽകിയിരുന്നത്.

ഇതേ ദിവസം സുൽത്താൻ ബത്തേരിയിൽ നിന്നും കണ്ണൂരിലേക്ക് സർവീസ് നടത്തുന്ന സ്വകാര്യ ബസിൽ വെച്ച് ലീലാമ്മയെ ചിലർ കണ്ടിരുന്നു. ഈ വിവരം അറിഞ്ഞ ബന്ധുക്കൾ ബസ് കണ്ടക്ടറുമായി സംസാരിച്ച് വീട്ടമ്മയുടെ സഞ്ചാരപഥം പിന്തുടരുകയായിരുന്നു. ബസിൽ നിന്നും കണ്ണൂർ കോളയാട് ഇറങ്ങി ചങ്ങലഗേറ്റ് എന്ന സ്ഥലത്ത് എത്തിയതിന്റെ ദൃശ്യങ്ങൾ സിസിടിവിയിൽ നിന്ന് ലഭിച്ചിരുന്നു. എന്നാൽ ഇവിടെ നിന്നും യാത്ര തുടർന്ന് ലീലാമ്മ നരിക്കോട്ട് മലയിലേക്ക് പോകുന്ന വനപാതയിലെത്തുകയായിരുന്നു.

ഇവിടെ വെച്ച് വീട്ടമ്മയെ പ്രദേശത്തെ തൊഴിലുറപ്പ്തൊഴിലാളികൾകണ്ടതായിഅറിയിച്ചിരുന്നു. തുടർന്നാണ് പോലീസും ബന്ധുക്കളും വനംവകുപ്പ് ജീവനക്കാരുടെ സഹായത്തോടെ ഈ മേഖല കേന്ദ്രീകരിച്ച് തിരച്ചിൽ തുടങ്ങിയത്. ശനിയാഴ്ച്ച മുതൽ ഈ മേഖലയിൽ പലതവണ തിരച്ചിൽ നടത്തിയിരുന്നെങ്കിലും വീട്ടമ്മയെ കണ്ടെത്താനായില്ല. എന്നാൽ ബുധനാഴ്ച പന്നിയോട് വനമേഖലയിൽ നടത്തിയ തിരച്ചിലിലാണ് മൃതദേഹം കണ്ടെത്തിയത്. ഭർത്താവ്: പരേതനായ ജോർജ്, മക്കൾ: പ്രിൻസി, റിൻസി, അക്ഷയ്.

### Related Links & Sources
- [Original Story Source](https://panoor.truevisionnews.com/news/103306/housewife-missing-from-wayanad-found-dead-in-kannur-foresthe-left-home-to-buy-medicine)